رمضان ٹرانسمیشنز میں سنسنی خیزی کی وجہ ریٹنگ کی دوڑ اور بھاری بجٹ ہے: مایا خان

معروف میزبان و اداکارہ مایا خان نے رمضان ٹرانسمیشنز کے گرتے ہوئے معیار اور بڑھتی ہوئی سنسنی خیزی پر کھل کر اظہارِ خیال کیا ہے۔ ایک نجی ٹی وی کے پروگرام میں گفتگو کرتے ہوئے مایا خان کا کہنا تھا کہ چینلز کی جانب سے سنسنی خیز مواد تیار کرنے کے لیے بھاری بجٹ دیے جاتے ہیں تاکہ زیادہ ویوز اور سرخیاں حاصل کی جا سکیں۔ انہوں نے اداکاروں کی میزبانی پر تبصرہ کرتے ہوئے کہا کہ پاکستان میں فنکاروں کو ڈراموں کے ‘ری رنز’ پر رائلٹی نہیں ملتی اور نہ ہی مناسب معاوضہ دیا جاتا ہے، جس کی وجہ سے کئی اداکار مالی مجبوری میں ایسے شوز کرنے پر راضی ہو جاتے ہیں۔ مایا خان نے ماضی میں وینا ملک کے وائرل استغفار کلپ کا تذکرہ کرتے ہوئے کہا کہ اس کے پیچھے صرف اداکارہ نہیں بلکہ وہ پروڈیوسرز بھی ذمہ دار تھے جو بیک گراؤنڈ سے ہدایات دے رہے تھے۔ ان کے بقول، پیشہ ورانہ مہارت کے بجائے توجہ حاصل کرنے والے مواد کو ترجیح دینا میڈیا انڈسٹری کا ایک منفی رجحان بن چکا ہے۔