مایا خان کی اپنی بھاری تنخواہ اور اس میں بڑی کٹوتی پر کھل کر گفتگو

پاکستانی میزبان اور اداکارہ مایا خان نے ایک حالیہ پوڈکاسٹ میں اپنی پیشہ ورانہ زندگی، بھاری تنخواہ اور بعد میں آنے والی نمایاں کمی پر کھل کر گفتگو کی ہے۔ مایا خان نے بتایا کہ ایک وقت تھا جب وہ مارننگ شو کی میزبانی کے عوض 25 لاکھ روپے ماہانہ تنخواہ لیا کرتی تھیں، تاہم بعد ازاں حالات بدل گئے اور انہیں 4 لاکھ روپے میں شو کرنے پر رضامند ہونا پڑا۔

مایا خان کا کہنا تھا کہ 2020 ان کی زندگی کا ایک مشکل مرحلہ تھا، جب وہ اچانک آسمان سے زمین پر آ گئیں۔ انہوں نے اعتراف کیا کہ اس وقت انہیں ہچکچاہٹ کا سامنا تھا، مگر پھر انہوں نے اللہ پر بھروسا کیا اور دعا کی کہ جو بھی رزق ملے اس میں برکت عطا ہو۔ ان کا کہنا تھا کہ اللہ 30 کو 30 کروڑ بھی بنا سکتا ہے۔

واضح رہے کہ مایا خان نے پی ٹی وی کے ڈرامے ’ایک محبت سو افسانے‘ سے شہرت حاصل کی، تاہم انہیں اصل پہچان نجی ٹی وی کے مقبول مارننگ شو سے ملی۔ بعد ازاں انہوں نے اداکاری میں واپسی کرتے ہوئے 2024 میں ڈرامہ ’مائی ری‘ میں کم بیک کیا، جبکہ ’کبھی میں کبھی تم‘ اور حالیہ ڈرامہ سیریل ’بڑے بھیا‘ میں ان کی اداکاری کو بھی ناظرین کی جانب سے خوب سراہا گیا۔

مایا خان کے اس انکشاف کو سوشل میڈیا پر بھی خاصی توجہ مل رہی ہے، جہاں مداح ان کی سچائی اور حوصلے کو سراہ رہے ہیں۔