بات پہلی بیوی بننے کی نہیں بات واحد بیوی ہونے کی ہے: مشال خان

کراچی: پاکستان کی معروف اداکارہ و میزبان مشال خان نے شادی سے متعلق اپنے خدشات، ترجیحات اور شرائط پر کھل کر گفتگو کی ہے۔

ایک حالیہ پوڈکاسٹ میں شرکت کے دوران مشال خان نے بتایا کہ شادی جیسا خاص موقع ابھی ان کی زندگی میں نہیں آیا، لیکن جب بھی ایسا ہو گا تو وہ اچانک ہی ہو گا۔ انہوں نے کہا کہ وہ اپنی شادی کو بالکل نجی (Private) رکھنا چاہتی ہیں اور انہیں اس بات کا خدشہ رہتا ہے کہ لوگ ان کی پرسنل لائف میں مداخلت نہ کریں۔ ان کی خواہش ہے کہ شادی کے اعلان کے بعد بھی لوگ اس پر بلاگز بنانے یا بلاوجہ باتیں کرنے سے گریز کریں۔

اپنی ازدواجی زندگی کی اہم ترجیح بیان کرتے ہوئے اداکارہ نے کہا کہ وہ ایسے مرد سے ہرگز شادی نہیں کریں گی جو دوسری شادی کرے۔ انہوں نے واضح کیا کہ “بات پہلی بیوی بننے کی نہیں بلکہ واحد بیوی ہونے کی ہے”۔

مشال خان کا مزید کہنا تھا کہ انہیں اپنے ہونے والے شوہر کے ماضی یا مطلقہ (Divorced) ہونے سے کوئی اعتراض نہیں، تاہم شرط یہ ہے کہ شادی کے وقت وہ شخص مکمل طور پر غیر شادی شدہ ہو اور ان دونوں کی زندگی میں کوئی دوسرا فریق نہ ہو۔