وزیراعلیٰ کوغیر معمولی محنت، انتظامی صلاحیت دوسروں سے ممتاز کرتی ہے: مریم اورنگزیب

پنجاب کی سینئر صوبائی وزیر مریم اورنگزیب نے کہا ہے کہ وزیراعلیٰ مریم نواز شریف کو ان کی غیر معمولی محنت، باریک بینی اور اعلیٰ انتظامی صلاحیتیں دیگر تمام حکمرانوں سے ممتاز کرتی ہیں۔

سماجی رابطے کے پلیٹ فارم ’ایکس‘ (سابقہ ٹوئٹر) پر جاری اپنے بیان میں مریم اورنگزیب نے بتایا کہ وزیراعلیٰ مریم نواز شریف کی زیر صدارت 2 گھنٹے طویل ایک جامع اجلاس منعقد ہوا، جس میں صوبے کے تمام 40 اضلاع اور 154 تحصیلوں میں جاری ترقیاتی کاموں، صفائی اور انتظامی کارکردگی کا تفصیلی جائز لیا گیا۔ انہوں نے بتایا کہ اجلاس کے دوران ستھرا پنجاب پروگرام، اسکولوں و ہسپتالوں کی صورتحال، گرین بیلٹس، فیملی پارکس، کھلے مین ہولز، اسٹریٹ لائٹس، قبرستانوں کی دیکھ بھال، آوارہ کتوں کی روک تھام اور غیر قانونی بینرز کے خاتمے جیسے تمام بنیادی اور اہم عوامی مسائل پر تفصیل سے بریفنگ لی گئی۔

سینئر وزیر نے مزید بتایا کہ اجلاس میں ریڑھی بازاروں اور ماڈل مارکیٹس کو منظم کرنے، بس اڈوں کی صفائی، اضلاع کے داخلی اور خارجی راستوں کو خوبصورت بنانے، سڑکوں پر موجود گڑھوں کی مرمت اور خصوصی ‘روڈ مینٹیننس اسکواڈز’ کے قیام کا جائزہ بھی لیا گیا۔ مریم اورنگزیب نے زور دیا کہ گڈ گورننس صرف بڑے اور دعویدار منصوبوں کے اعلانات کا نام نہیں بلکہ گلی محلوں میں شہریوں کو بنیادی سہولیات کی فراہمی کا نام ہے، اور پنجاب کو مریم نواز شریف کی صورت میں ایک متحرک، جدید اور محنتی قیادت میسر آئی ہے۔