سجل علی اور حمزہ سہیل کی شادی؟ اداکارہ کا بیان سامنے آ گیا

پاکستانی شوبز انڈسٹری کی معروف اداکارہ سجل علی اور اداکار حمزہ سہیل سوشل میڈیا پر زیرِ بحث ہیں، جہاں دونوں کی ممکنہ شادی سے متعلق قیاس آرائیاں گردش کر رہی ہیں۔ مختلف انسٹاگرام اکاؤنٹس پر دعویٰ کیا جا رہا تھا کہ دونوں 2026 میں رشتۂ ازدواج میں منسلک ہو سکتے ہیں، جس کے بعد مداحوں میں خاصا جوش و خروش دیکھنے میں آیا۔

تاہم سجل علی نے انسٹاگرام اسٹوری کے ذریعے ان خبروں کی تردید کرتے ہوئے مداحوں سے اپیل کی کہ وہ بغیر تصدیق شدہ دعووں پر یقین نہ کریں۔ اداکارہ کا کہنا تھا کہ کوئی بھی ذاتی خبر، اگر کبھی ہوئی، تو وہ خود براہِ راست شیئر کریں گی۔

سجل علی کا شمار پاکستانی ڈرامہ انڈسٹری کی باصلاحیت اور ورسٹائل اداکاراؤں میں ہوتا ہے، جنہوں نے اورنگریزہ، گلِ رانا، یقین کا سفر، یہ دل میرا، آنگن، دھوپ کی دیوار، کچھ ان کہی، صنفِ آہن اور دیگر مقبول ڈراموں میں شاندار اداکاری سے شہرت حاصل کی۔

دوسری جانب حمزہ سہیل نے بھی کم وقت میں انڈسٹری میں اپنی مضبوط شناخت بنائی۔ ان کے نمایاں ڈراموں میں فیری ٹیل سیزن 1 اور 2، زرد پتوں کا بن، برنس روڈ کے رومیو جولیٹ اور دل والی گلی میں شامل ہیں۔ خاص طور پر زرد پتوں کا بن اور دل والی گلی میں سجل علی کے ساتھ ان کی جوڑی کو ناظرین نے بے حد پسند کیا۔

سوشل میڈیا پر مداح اس جوڑی کے لیے نیک تمناؤں کا اظہار کر رہے ہیں، تاہم سجل علی کے بیان کے بعد واضح ہو گیا ہے کہ شادی سے متعلق گردش کرنے والی خبریں محض افواہیں ہیں۔