مارک زکربرگ نے اے آئی سے روزگار ختم ہونے کی پیشگوئی مسترد کر دی

میٹا کے چیف ایگزیکٹو مارک زکربرگ نے مصنوعی ذہانت (AI) سے کروڑوں افراد کی ملازمتیں ختم ہونے اور انسانیت کو درپیش خطرات کے تاثر کو سختی سے مسترد کر دیا ہے۔ ایک امریکی اخبار میں لکھے گئے اپنے مضمون میں مارک زکربرگ نے موقف اختیار کیا کہ اے آئی ٹیکنالوجی کا کنٹرول محض چند حکومتوں یا طاقتور اداروں تک محدود رہنے کے بجائے عام لوگوں کی رسائی میں ہونا چاہیے تاکہ نئے کاروبار اور ملازمتوں کے مزید مواقع پیدا ہو سکیں۔ انہوں نے ان ماہرین کے خدشات پر حیرت کا اظہار کیا جو خود اس ٹیکنالوجی کی تیاری میں مصروف ہیں اور ساتھ ہی اس کے خطرناک ہونے کی پیشگوئی کرتے ہیں۔ میٹا کے سربراہ کے مطابق اے آئی تاریخ کی دیگر انقلابی ٹیکنالوجیز کی طرح انسانوں کو نئی مہارتیں سیکھنے اور آگے بڑھنے میں مددگار ثابت ہو گی۔