رجب بٹ اور ندیم مبارک پر جوا ایپ کی پروموشن کے کیس سے متعلق بڑی پیشرفت

سیشن کورٹ لاہور میں ایڈیشنل سیشن جج منصور احمد قریشی نے دونوں ملزمان کی عبوری ضمانت کی درخواستوں پر سماعت کی۔ سماعت کے دوران رجب بٹ اور ندیم مبارک کو سخت سکیورٹی حصار میں عدالت میں پیش کیا گیا۔

اس موقع پر این سی سی آئی اے کے وکیل نے عدالت کو آگاہ کیا کہ تفتیشی افسر اس وقت ہائیکورٹ میں مصروف ہیں، اس لیے ریکارڈ پیش کرنے کے لیے مہلت دی جائے۔ عدالت نے استدعا منظور کرتے ہوئے عبوری ضمانت کی درخواستوں کو انتظار میں رکھ لیا۔

عدالت نے دونوں ملزمان کی حاضری مکمل قرار دیتے ہوئے انہیں کمرۂ عدالت سے واپس جانے کی اجازت دے دی۔

واضح رہے کہ این سی سی آئی اے نے رجب بٹ اور ندیم مبارک کے خلاف جوا ایپ کی پروموشن کرنے کے الزام میں مقدمہ درج کر رکھا ہے، جس میں تفتیش کا عمل جاری ہے۔