اسلام آباد،خودکش حملے میں ملوث دہشت گرد سیل کے چار سہولت کار گرفتار

اسلام آباد کے جوڈیشل کمپلیکس جی الیون میں ہونے والے خودکش دھماکے کی تحقیقات میں اہم پیشرفت ہوئی ہے۔ قانون نافذ کرنے والے اداروں نے کارروائی کرتے ہوئے خودکش حملے میں ملوث دہشت گرد سیل کے چار سہولت کاروں کو گرفتار کرلیا۔

ترجمان کے مطابق یہ مشترکہ کارروائی انٹیلی جنس بیورو (IB) اور کاؤنٹر ٹیررازم ڈیپارٹمنٹ (CTD) نے کی، جس کا ہدف ٹی ٹی پی / فتنہ الخوارج کے اس نیٹ ورک کو توڑنا تھا جو اسلام آباد میں حملے کی منصوبہ بندی اور معاونت کر رہا تھا۔

تحقیقات کے دوران انکشاف ہوا کہ خودکش حملہ آور کو ہدایات ٹی ٹی پی کے کمانڈر سعید الرحمان عرف “داد اللہ” نے ٹیلی گرام کے ذریعے دیں۔ “داد اللہ” کا تعلق ضلع باجوڑ کے علاقے نواگئی سے ہے اور اس وقت افغانستان میں موجود ٹی ٹی پی کا اہم انٹیلی جنس عہدیدار ہے۔

گرفتار ہینڈلر ساجد اللہ عرف “شینا” نے اعتراف کیا کہ اس نے خودکش حملہ آور کو سہولت فراہم کی، جبکہ حملے کا مقصد قانون نافذ کرنے والے اداروں کو زیادہ سے زیادہ جانی نقصان پہنچانا تھا۔
حکام کے مطابق گرفتار دہشت گردوں سے مزید تفتیش جاری ہے، اور توقع ہے کہ اس نیٹ ورک کے مزید اہم کرداروں تک بھی رسائی حاصل کی جائے گی۔
ذرائع کا کہنا ہے کہ یہ پیشرفت اسلام آباد اور ملک بھر میں امن و امان کی صورتحال کو بہتر بنانے کے لیے اہم سنگِ میل ثابت ہوگی۔