گلگت بلتستان میں 22 سال بعد بلدیاتی انتخابات کا بگل بج گیا؛ 2 اگست کو پولنگ ہوگی، چیف الیکشن کمشنر نے شیڈول جاری کر دیا

گلگت: گلگت بلتستان کے چیف الیکشن کمشنر راجہ شہباز خان نے خطے میں بلدیاتی انتخابات کے انعقاد کے تاریخی شیڈول پر باقاعدہ دستخط کر کے اسے جاری کر دیا ہے۔

چیف الیکشن کمشنر راجہ شہباز خان کے مطابق، گلگت بلتستان میں بلدیاتی انتخابات کا معرکہ رواں سال 2 اگست کو سجے گا، جہاں عوام اپنے مقامی نمائندوں کا انتخاب کریں گے۔ انہوں نے واضح کیا کہ گلگت بلتستان کی تاریخ میں یہ انتخابات انتہائی اہمیت کے حامل ہیں کیونکہ خطے میں پورے 22 سال کے طویل عرصے کے بعد بلدیاتی الیکشن ہونے جا رہے ہیں۔

چیف الیکشن کمشنر کی جانب سے جاری کردہ آفیشل شیڈول کے مطابق، انتخابی مراحل کی تفصیلات درج ذیل ہیں انتخابی عمل کا باقاعدہ آغاز 6 جون سے ہوگا جب ریٹرننگ افسران (ROs) باضابطہ طور پر پبلک نوٹسز جاری کریں گے۔ انتخابات میں حصہ لینے کے خواہشمند امیدواروں کے لیے 9 جون سے 15 جون تک کی تاریخ مقرر کی گئی ہے، جس کے دوران کاغذاتِ نامزدگی جمع کرائے جا سکیں گے۔

گلگت بلتستان الیکشن کمیشن کے حکام کا کہنا ہے کہ طویل عرصے بعد ہونے والے ان انتخابات کے لیے تمام تر تیاریاں ہنگامی بنیادوں پر مکمل کی جا رہی ہیں تاکہ انتخابی عمل کو شفاف، آزادانہ اور پرامن ماحول میں یقینی بنایا جا سکے۔