رواں سال نیویارک میں قتل اور فائرنگ کے واقعات کم ترین سطح پر، اعداد و شمار جاری

امریکی شہر نیویارک میں 2026 کے پہلے پانچ ماہ کے دوران قتل، فائرنگ کے واقعات اور فائرنگ سے متاثرہ افراد کی تعداد ریکارڈ کم ترین سطح پر پہنچ گئی، جبکہ مجموعی سنگین جرائم میں بھی نمایاں کمی دیکھنے میں آئی ہے۔

نیویارک پولیس ڈیپارٹمنٹ (این وائی پی ڈی) کے مطابق جنوری سے مئی 2026 تک قتل کے 102 واقعات رپورٹ ہوئے، جو گزشتہ سال کے اسی عرصے میں 129 تھے۔ اس طرح قتل کے واقعات میں 20.9 فیصد کمی ریکارڈ کی گئی، جو اسی مدت کے دوران اب تک کی کم ترین سطح ہے۔

اسی عرصے میں فائرنگ کے واقعات 5.7 فیصد کمی کے ساتھ 247 تک محدود رہے، جبکہ فائرنگ سے متاثرہ افراد کی تعداد 7.1 فیصد کمی کے ساتھ 289 رہی۔

مئی 2026 بھی جرائم کے لحاظ سے ایک نمایاں طور پر محفوظ مہینہ ثابت ہوا، جس دوران فائرنگ کے صرف 51 واقعات رپورٹ ہوئے جبکہ فائرنگ سے متاثرہ افراد کی تعداد 58 رہی۔ یہ دونوں اعداد و شمار بھی ریکارڈ سطح کے قریب کم ترین قرار دیے جا رہے ہیں۔

نیویارک پولیس کے مطابق مئی کے دوران شہر بھر میں مجموعی سنگین جرائم میں 10.6 فیصد کمی ہوئی، جبکہ سال کے پہلے پانچ ماہ کے دوران مجموعی بڑے جرائم میں 6.2 فیصد کمی ریکارڈ کی گئی۔ ڈکیتی، گھروں میں چوری، گاڑیوں کی چوری اور دیگر سنگین جرائم میں بھی واضح کمی دیکھی گئی۔

پبلک ہاؤسنگ (سرکاری رہائشی منصوبوں) میں بھی جرائم کی شرح ریکارڈ حد تک کم رہی، جہاں قتل، فائرنگ اور ڈکیتی کے واقعات میں نمایاں کمی دیکھنے میں آئی، جسے این وائی پی ڈی نے “محفوظ ترین آغازِ سال” قرار دیا ہے۔

نیویارک پولیس کمشنر جیسیکا ٹش کے مطابق شہر میں “پریسیژن پولیسنگ” حکمت عملی، غیر قانونی اسلحے کے خلاف کارروائیاں، گینگ نیٹ ورکس کے خلاف کریک ڈاؤن اور ضرورت کے مطابق افسران کی تعیناتی کے باعث مثبت نتائج حاصل ہو رہے ہیں۔ ان کے مطابق رواں سال اب تک تقریباً دو ہزار غیر قانونی اسلحہ قبضے میں لیا جا چکا ہے جبکہ گینگ سے متعلق 20 بڑی کارروائیاں بھی کی گئی ہیں۔

شہر کے سب وے نظام میں بھی جرائم میں کمی دیکھی گئی، جہاں مئی کے دوران فائرنگ کا کوئی واقعہ رپورٹ نہیں ہوا جبکہ مجموعی جرائم میں 6.5 فیصد کمی ریکارڈ کی گئی۔

تاہم رپورٹ میں یہ بھی بتایا گیا ہے کہ نفرت پر مبنی جرائم میں اضافہ دیکھا گیا۔ مئی 2026 کے دوران 68 واقعات کو نفرت انگیز جرائم قرار دیا گیا، جن میں سے 60 فیصد سے زائد واقعات یہودی مخالف نوعیت کے تھے۔

این وائی پی ڈی کا کہنا ہے کہ موسمِ گرما کے دوران جرائم میں مزید کمی کے لیے خصوصی “وائلنس ریڈکشن زونز” اور نوجوانوں کے تحفظ کے پروگرام جاری رکھے جائیں گے تاکہ شہر میں امن و امان کی صورتحال برقرار اور مزید بہتر بنائی جا سکے۔