پاکستان سٹاک مارکیٹ ایک لاکھ 71 ہزار پوائنٹس کی حد پر بحال

کراچی: پاکستان اسٹاک مارکیٹ (PSX) میں کاروباری ہفتے کے چوتھے روز زبردست تیزی کا رجحان دیکھا گیا ہے، جس کے نتیجے میں کے ایس ای (KSE) 100 انڈیکس ایک بار پھر ایک لاکھ 71 ہزار پوائنٹس کی نفسیاتی حد پر بحال ہو گیا ہے۔

مارکیٹ ذرائع کے مطابق، جمعرات کے روز کاروبار کا آغاز ہوتے ہی انویسٹرز کی جانب سے بھرپور خریداری دیکھنے میں آئی۔ ابتدائی سیشن کے دوران ہی انڈیکس میں 1000 سے زائد پوائنٹس کا بڑا اضافہ ریکارڈ کیا گیا، جس کے ساتھ ہی پاکستان اسٹاک مارکیٹ کا ہنڈرڈ انڈیکس 1 لاکھ 71 ہزار 271 پوائنٹس کی بلند سطح پر پہنچ گیا۔

اسٹاک مارکیٹ کے ماہرین کا کہنا ہے کہ آج کی تیزی نے گزشتہ روز ہونے والے بڑے خسارے کا ازالہ کر دیا ہے۔واضح رہے کہ اس سے پچھلے کاروباری دن کے اختتام پر مارکیٹ شدید مندی کی زد میں رہی تھی، جہاں 100 انڈیکس 831 پوائنٹس کی نمایاں کمی کے بعد 1 لاکھ 70 ہزار 190 پوائنٹس کی سطح پر بند ہوا تھا۔ تاہم، آج سرمایہ کاروں کے مثبت ردِعمل اور مارکیٹ میں آنے والے نئے سرمائے کی بدولت انڈیکس نے نہ صرف اپنی پرانی پوزیشن بحال کی بلکہ ایک نیا سنگِ میل بھی عبور کر لیا ہے۔