ماہرہ خان نے صبا قمر کے ساتھ خاموش دشمنی کی افواہوں کی تردید کر دی

عالمی شہرت یافتہ پاکستانی سُپر اسٹار ماہرہ خان نے اداکارہ صبا قمر کے ساتھ مبینہ خاموش رقابت کے حوالے سے خبروں کی سختی سے تردید کی ہے۔

حال ہی میں ماہرہ خان نے اپنی نئی فلم ’نیلوفر‘ کی تشہیر کے لیے اداکار فواد خان کے ساتھ ایک نجی ٹی وی پروگرام میں شرکت کی۔ پروگرام کے دوران ایک مداح نے ماہرہ سے سوال کیا کہ میڈیا پر آپ اور صبا قمر کے درمیان ہمیشہ خاموش دشمنی دکھائی جاتی رہی ہے، اس میں کتنی حقیقت ہے؟

ماہرہ خان نے جواب میں کہا کہ بالکل بھی نہیں، یہ سوال کئی بار پوچھا جا چکا ہے اور میرا ہمیشہ یہی جواب رہا ہے کہ میری طرف سے ایسا کچھ نہیں ہے۔ انہوں نے صبا قمر کی تعریف کرتے ہوئے کہا کہ وہ ایک بہترین اداکارہ ہیں، اور دنیا اکثر دو کامیاب خواتین کو ایک ساتھ دیکھ کر ان کے درمیان مقابلہ یا دشمنی کا تاثر پیدا کرنے کی کوشش کرتی ہے۔

ماہرہ نے مزید کہا کہ ابھی تک انہوں نے صبا قمر کے ساتھ کام نہیں کیا، لیکن اگر کبھی موقع ملا تو وہ ان کے ساتھ کام کرنا پسند کریں گی، جس سے ایک بہترین پروجیکٹ سامنے آ سکتا ہے۔