ہمایوں سعید کو رومانوی کے بجائے منفی کرداروں کی طرف جانا چاہئے، ماہرہ خان

پاکستان کی سپر اسٹار ماہرہ خان نے اپنے ساتھی اداکار ہمایوں سعید کو مشورہ دیا ہے کہ وہ اب روایتی رومانوی ہیرو کے بجائے منفی اور ایکشن سے بھرپور کرداروں کی طرف قدم بڑھائیں تاکہ مداح انہیں ایک بالکل نئے روپ میں دیکھ سکیں۔

اپنی آنے والی فلم ‘آگ لگے بستی میں’ کی پروموشن کے دوران میڈیا سے گفتگو کرتے ہوئے ماہرہ خان نے کہا کہ ہمایوں سعید ایکشن سینز سے بہت لطف اندوز ہوتے ہیں۔ ان کا کہنا تھا کہ “میرا خیال ہے ہمایوں کو اب ولن یا ‘نوڑی نتھ’ جیسے جاندار ایکشن کردار کرنے چاہئیں جہاں وہ اپنی اداکاری کا ایک مختلف اور اچھوتا پہلو دکھا سکیں”۔

اسی موقع پر موجود اداکار فہد مصطفیٰ نے ماہرہ کی بات سے اتفاق کرتے ہوئے کہا کہ انہیں خود بھی ایکشن فلمیں پسند ہیں، تاہم پاکستان میں جدید تکنیکی سہولیات کی کمی ایک بڑا چیلنج ہے۔ فہد مصطفیٰ نے انکشاف کیا کہ فلم ‘آگ لگے بستی میں’ کی شوٹنگ کے دوران ایک ایکشن سین عکسبند کرواتے ہوئے ان کی انگلی بھی فریکچر ہوگئی تھی۔ واضح رہے کہ یہ فلم ایکشن اور کامیڈی کا حسین امتزاج ہے جس میں ماہرہ خان اور فہد مصطفیٰ مرکزی کردار ادا کر رہے ہیں۔