میرے شوہر ہی میرا کرش ہیں: ماہرہ خان کا انکشاف

عالمی شہرت یافتہ پاکستانی اداکارہ ماہرہ خان نے ایک نجی ٹی وی کے ٹاک شو میں شرکت کے دوران اپنی نجی زندگی اور شوبز انڈسٹری کے حوالے سے دلچسپ گفتگو کی ہے۔ پروگرام کے دوران جب ان سے سوال کیا گیا کہ “پورا پاکستان آپ پر کرش رکھتا ہے، لیکن آپ کا کرش کون ہے؟” تو ماہرہ خان نے مسکراتے ہوئے جواب دیا کہ ان کے شوہر ہی ان کا اصل کرش ہیں، جس پر ہال میں موجود حاضرین نے خوب تالیاں بجائیں۔

اداکارہ نے گفتگو کے دوران فنکاروں کے معاوضوں اور مالی مشکلات پر بھی سنجیدہ گفتگو کی۔ ان کا کہنا تھا کہ پاکستان میں فنکاروں اور خصوصاً ٹیکنیشنز کو ان کے کام کے مطابق مناسب معاوضہ ملنا چاہیے، جیسا کہ عالمی سطح پر رائج ہے۔ ماہرہ خان نے زور دیا کہ اگرچہ ہم ہالی ووڈ کا مقابلہ نہیں کر رہے، لیکن کم از کم اتنا معاوضہ ضرور ہونا چاہیے کہ کوئی آرٹسٹ مالی بحران کا شکار نہ ہو۔ انہوں نے جونیئر آرٹسٹس اور پسِ پردہ کام کرنے والے عملے کے حقوق کے لیے آواز اٹھائی۔

ایک سوال کے جواب میں انہوں نے بتایا کہ انہیں عید الاضحیٰ کے مقابلے میں عید الفطر زیادہ پسند ہے۔ ماہرہ خان نے اپنے ساتھی اداکار فہد مصطفیٰ کا تذکرہ کرتے ہوئے بتایا کہ فہد نے انہیں پہلے سن گلاسز اور پھر چپل بطور تحفہ دی تھی۔ ماہرہ خان کی اس بے باک اور دلچسپ گفتگو کو سوشل میڈیا پر مداحوں کی جانب سے بے حد پسند کیا جا رہا ہے۔