پاکستانی کمپنی نے جدید لیتھیم آئن بیٹریاں متعارف کرادیں

پاکستان کی ایک مقامی کمپنی نے توانائی کے شعبے میں بڑی کامیابی حاصل کرتے ہوئے جدید ٹیکنالوجی سے لیس ’میڈ ان پاکستان‘ لیتھیم آئن بیٹریاں متعارف کرا دی ہیں۔ اس اہم پیش رفت کے حوالے سے پاکستان اسٹاک ایکسچینج (PSX) کو بھی باقاعدہ طور پر مطلع کر دیا گیا ہے۔ کمپنی کی جانب سے جاری کردہ اعلامیے کے مطابق، یہ بیٹریاں خصوصی طور پر رہائشی ضروریات اور روف ٹاپ سولر سسٹمز کے لیے ڈیزائن کی گئی ہیں، جو ملک میں متبادل توانائی کے حل کو فروغ دینے میں مددگار ثابت ہوں گی۔

کمپنی کا کہنا ہے کہ یہ بیٹریاں روایتی لیڈ ایسڈ بیٹریوں کے مقابلے میں زیادہ کارکردگی اور طویل عمر کی حامل ہیں، اور انہیں ہائبرڈ انورٹرز اور جدید انرجی مینجمنٹ سسٹمز کے ساتھ ہم آہنگ کیا گیا ہے۔ ماہرین کے مطابق، مقامی سطح پر لیتھیم بیٹریوں کی تیاری سے نہ صرف شمسی توانائی کے صارفین کو سستی اور پائیدار سہولیات میسر آئیں گی، بلکہ اس سے قیمتی زرِ مبادلہ کی بچت اور ملکی صنعت کو بھی تقویت ملے گی۔