ہالی ووڈ اداکار جانی ڈیپ کی بیٹی نے کمائی میں سب کو پیچھے چھوڑ دیا

معروف ہالی ووڈ اداکار جانی ڈیپ کی بیٹی اور معروف ماڈل و اداکارہ للی روز ڈیپ نے سوشل میڈیا کی دنیا میں ایک بڑی کامیابی حاصل کر لی ہے اور وہ سب سے زیادہ کمائی کرنے والی جین زی انفلوئنسر بن گئی ہیں۔

میڈیا رپورٹس کے مطابق للی روز ڈیپ ایک انسٹاگرام پوسٹ کے عوض اوسطاً 11 ہزار 324 پاؤنڈ کماتی ہیں، جس کے باعث وہ اس فہرست میں سرفہرست قرار پائی ہیں۔

25 سالہ للی روز ڈیپ، جو سیریز ’دی آئیڈل‘ میں اپنی اداکاری کے باعث خبروں میں رہیں، انسٹاگرام پر 84 لاکھ فالوورز رکھتی ہیں۔ وہ زیادہ تر اپنے پیشہ ورانہ منصوبوں، فلمی سرگرمیوں اور تخلیقی کام سے متعلق مواد شیئر کرتی ہیں، جو انہیں دیگر مشہور شخصیات سے منفرد بناتا ہے جو عموماً فیشن اور گلیمر تک محدود رہتی ہیں۔

فہرست میں دوسرے نمبر پر ول اسمتھ اور جیڈا پنکٹ اسمتھ کے بیٹے جیڈن اسمتھ ہیں، جو فی انسٹاگرام پوسٹ تقریباً 9 ہزار 690 پاؤنڈ کماتے ہیں۔ اگرچہ ان کے فالوورز کی تعداد ایک کروڑ 90 لاکھ سے زائد ہے، تاہم ان کا انگیجمنٹ ریٹ نسبتاً کم بتایا جاتا ہے۔

تیسرے نمبر پر لیونل رچی کی بیٹی صوفیہ رچی گرینج ہیں، جن کی فی پوسٹ آمدن 9 ہزار 614 پاؤنڈ ہے۔

اس فہرست میں بروکلین پیلٹز بیکہم، گریسی ایبرامز، مایا ہاک، ولو اسمتھ، کائیا گیربر، نیکو پارکر اور لیلا موس بھی ٹاپ ٹین میں شامل ہیں۔

یہ فہرست اس بات کی عکاسی کرتی ہے کہ فلمی خاندانوں سے تعلق رکھنے والے نوجوان ستارے سوشل میڈیا پلیٹ فارمز کو استعمال کرتے ہوئے کس طرح نمایاں مالی کامیابیاں حاصل کر رہے ہیں۔