اداکارہ لائبہ خان نے شوہر کیساتھ تصاویر شیئر کردیں

کراچی: پاکستانی ڈرامہ انڈسٹری کی معروف اداکارہ لائبہ خان نے رواں ماہ اچانک اپنی شادی کا اعلان کرکے مداحوں کو حیران کر دیا تھا، تاہم اب انہوں نے شوہر کو منظرِ عام پر لا کر سوشل میڈیا پر جاری تمام قیاس آرائیوں کا عملی جواب دے دیا ہے۔

لائبہ خان کے مطابق ان کا نکاح نومبر 2024 میں مدینہ منورہ میں ہوا تھا، جس کا باضابطہ اعلان انہوں نے 27 جنوری 2026 کو اپنے انسٹاگرام اکاؤنٹ پر کیا۔ اعلان کے بعد اداکارہ نے شادی سے جڑی مختلف تقریبات کی جھلکیاں بھی مداحوں کے ساتھ شیئر کیں، جن میں نکاح فوٹو شوٹ، دعائے خیر، ڈھولکی اور برائیڈل شاور شامل تھیں۔

تاہم لائبہ خان کی جانب سے صرف سولو تصاویر شیئر کرنے اور شوہر کو منظرِ عام پر نہ لانے پر سوشل میڈیا پر مختلف قیاس آرائیاں شروع ہو گئیں۔ بعض صارفین نے تنقید کرتے ہوئے کہا کہ شوہر کی شناخت چھپانے سے غیر ضروری بحث نے جنم لیا، جبکہ کچھ افراد نے بے بنیاد الزامات بھی عائد کیے۔

اب تمام تر بحث کے بعد لائبہ خان نے انسٹاگرام پر اپنے شوہر کے ساتھ ہلدی ایونٹ کی تصاویر شیئر کر دی ہیں۔ تصاویر کے کیپشن میں اداکارہ نے ناقدین اور مداحوں دونوں کو مخاطب کرتے ہوئے لکھا:
“اب خوش؟ براہِ مہربانی ماشاءاللہ کہہ دو۔”

اداکارہ کے اس اقدام کے بعد سوشل میڈیا پر مثبت ردعمل دیکھنے میں آ رہا ہے اور مداحوں کی بڑی تعداد لائبہ خان کے لیے نیک تمناؤں اور مبارکباد کے پیغامات دے رہی ہے۔