لاہور: اسلام پورہ میں ٹک ٹاکر ارشمہ کی ہلاکت کو پولیس نے خودکشی قرار دے دیا

لاہور کے علاقے اسلام پورہ میں معروف ٹک ٹاکر اور بیوٹیشن ارشمہ کی پراسرار ہلاکت کے معاملے میں پیش رفت سامنے آئی ہے، جہاں پولیس ذرائع نے جائے وقوعہ سے ملنے والے ابتدائی شواہد اور معائنے کی بنیاد پر موت کو خودکشی قرار دیا ہے۔ پولیس کے مطابق ارشمہ نے مبینہ طور پر گلے میں پھندہ لگا کر اپنی زندگی کا خاتمہ کیا۔ متوفیہ احمد ہاسٹل کے فلیٹ نمبر 203 میں اکیلی رہائش پذیر تھیں اور انہوں نے کچھ عرصہ قبل ہی یہ فلیٹ کرائے پر لیا تھا۔

پولیس کا کہنا ہے کہ متوفیہ کی لاش کو پوسٹ مارٹم کے مراحل سے گزارنے کے بعد باضابطہ طور پر ورثاء کے حوالے کر دیا گیا ہے، جبکہ موت کی حتمی وجہ کا تعین کرنے کے لیے جسمانی نمونے فرانزک تجزیے کے لیے لیبارٹری بھجوا دیے گئے ہیں۔ حکام کے مطابق فرانزک رپورٹ موصول ہونے کے بعد کیس میں مزید قانونی کارروائی عمل میں لائی جائے گی۔ واضح رہے کہ ٹک ٹاکر ارشمہ کی لاش چند روز قبل ان کے بند فلیٹ کے اندر سے پراسرار حالت میں برآمد ہوئی تھی جس پر مختلف خدشات کا اظہار کیا جا رہا تھا۔