لاہور ہائیکورٹ: کم عمر بچوں کے سوشل میڈیا استعمال پر پابندی کیلئے درخواست دائر

لاہور ہائیکورٹ میں 16 سال سے کم عمر بچوں کے سوشل میڈیا کے استعمال پر پابندی عائد کرنے کے لیے آئینی درخواست دائر کر دی گئی۔

درخواست آٹھویں جماعت کی طالبہ عالیہ سلیم نے اپنی وکیل شیزا قریشی کے توسط سے دائر کی، جس میں وفاقی حکومت، پاکستان ٹیلی کمیونیکیشن اتھارٹی (پی ٹی اے) اور دیگر متعلقہ اداروں کو فریق بنایا گیا ہے۔

درخواست میں مؤقف اختیار کیا گیا ہے کہ ٹک ٹاک، فیس بک، یوٹیوب اور دیگر سوشل میڈیا پلیٹ فارمز کم عمر بچوں کی ذہنی، اخلاقی اور تعلیمی نشوونما پر منفی اثرات مرتب کر رہے ہیں۔

درخواست گزار کے مطابق بچوں کے بنیادی حقوق کا تحفظ ریاست کی آئینی ذمہ داری ہے، تاہم سوشل میڈیا کے بے جا استعمال سے کمسن بچوں کی نفسیات شدید متاثر ہو رہی ہے۔

عدالت سے استدعا کی گئی ہے کہ 16 سال سے کم عمر بچوں کے سوشل میڈیا استعمال پر پابندی کا حکم دیا جائے اور بچوں کی عمر کے مطابق سوشل میڈیا کے استعمال کے لیے واضح رولز اور ریگولیشنز بنانے کی ہدایت بھی جاری کی جائے۔

Slug (English):