میشا شفیع کی 50 لاکھ روپے کیش بطور شورٹی جمع کروانے کی درخواست پر نوٹس

لاہور: لاہور ہائیکورٹ نے معروف گلوکارہ و اداکارہ میشا شفیع کی جانب سے 50 لاکھ روپے نقد بطور زامن (شورٹی) جمع کروانے کی متفرق درخواست پر باضابطہ نوٹسز جاری کرتے ہوئے متعلقہ فریقین سے جواب طلب کر لیا ہے۔

جسٹس احمد ندیم ارشد کی سربراہی میں لاہور ہائیکورٹ کے دو رکنی بینچ نے میشا شفیع کی متفرق درخواست پر سماعت کی۔ اس سے قبل عدالت عالیہ نے اداکارہ کو 25 لاکھ روپے نقد اور 25 لاکھ روپے کا مچلکہ (شورٹی بانڈ) جمع کروانے کی ہدایت کی تھی، تاہم اداکارہ نے عدالتی حکم کی تعمیل میں مچلکے کے بجائے تمام 50 لاکھ روپے کی رقم نقد جمع کروانے کی اجازت کے لیے متفرق درخواست دائر کی ہے۔

واضح رہے کہ سیشن کورٹ لاہور نے گلوکار علی ظفر کی جانب سے دائر ہتکِ عزت کے دعوے پر میشا شفیع کو 50 لاکھ روپے ہرجانہ ادا کرنے کا حکم دیا تھا، جس کے خلاف اداکارہ نے ہائیکورٹ سے رجوع کیا تھا اور لاہور ہائیکورٹ نے ٹرائل کورٹ کے فیصلے پر حکمِ امتناعی (سٹے آرڈر) جاری کر رکھا ہے۔