جوا پرموشن ایپ: ڈکی بھائی انکی اہلیہ سمیت دیگر ملزمان پر فرد جرم عائد

لاہور: لاہور کے جوڈیشل مجسٹریٹ نعیم ووٹو نے یوٹیوبر سعد الرحمان عرف ڈکی بھائی اور دیگر ملزمان کے خلاف جوئے ایپ کی پروموشن سے متعلق مقدمے کی سماعت کی۔

سماعت کے دوران ڈکی بھائی، ان کی اہلیہ عروب جتوئی اور دیگر ملزمان عدالت میں پیش ہوئے اور اپنی حاضری مکمل کروائی۔ این سی سی آئی اے نے ملزمان کے خلاف پہلے ہی چالان عدالت میں جمع کروایا ہوا تھا۔

عدالت میں سرکاری وکیل نے ملزمان کو چارج شیٹ پڑھ کر سنائی، جس پر تمام ملزمان نے صحت جرم سے انکار کیا۔ بعد ازاں عدالت نے ڈکی بھائی، ان کی اہلیہ عروب جتوئی اور دیگر ملزمان پر فرد جرم عائد کر دی۔

جوڈیشل مجسٹریٹ نعیم ووٹو نے مقدمے کے گواہوں کو 23 فروری کو دوبارہ طلب کر لیا ہے۔ این سی سی آئی اے نے ڈکی بھائی اور دیگر کے خلاف مقدمہ درج کر رکھا ہے۔