جوا ایپ کی تشہیر: رجب بٹ سمیت ملزمان کی عبوری ضمانت پر سماعت ملتوی

لاہور کی سیشن کورٹ میں جوئے کی موبائل ایپلی کیشن کی مبینہ تشہیر کے مقدمے میں نامزد یوٹیوبرز رجب بٹ، ندیم نانی والا اور دیگر کی عبوری ضمانتوں پر سماعت ہوئی۔ ایڈیشنل سیشن جج منصور قریشی نے کیس کی سماعت کی۔ دورانِ سماعت عدالت نے این سی سی آئی اے (NCCIA) سے مقدمے کا مکمل ریکارڈ طلب کرتے ہوئے سماعت میں کچھ دیر کا وقفہ کر دیا۔ سماعت کے موقع پر رجب بٹ اور زرق نے عدالت میں پیش ہو کر اپنی حاضری مکمل کروائی، تاہم ندیم نانی والا عدالت میں حاضر نہ ہو سکے۔ ان کے وکیل رانا معروف نے عدالت کو بتایا کہ سحری کے بعد ان کے موکل کی طبیعت خراب ہو گئی ہے اور انہیں فوڈ پوائزننگ کی شکایت ہے، جس کی بنا پر ایک روزہ حاضری سے استثنیٰ دیا جائے۔ واضح رہے کہ مذکورہ ملزمان کے خلاف جوئے کی ایپس کو فروغ دینے کے الزام میں قانونی کارروائی جاری ہے۔