صرف ایک منٹ میں تیار، لیڈی گاگا نے اپنی 3 چیزوں والی میک اپ روٹین بتا دی

لاس اینجلس: معروف امریکی گلوکارہ و اداکارہ لیڈی گاگا نے اپنے مداحوں کے ساتھ انتہائی مختصر، آسان اور تیز ترین میک اپ روٹین شیئر کر دی ہے، جس میں وہ بالکل قدرتی اور بغیر میک اپ کی حالت میں بھی نظر آئیں۔

40 سالہ پاپ اسٹار نے انسٹاگرام پر ایک ‘گیٹ ریڈی ود می’ (Get Ready With Me) ویڈیو شیئر کی، جس میں انہوں نے بتایا کہ وہ محض ایک منٹ کے اندر صرف تین بیوٹی پروڈکٹس کا استعمال کرتے ہوئے اپنا مکمل لُک تیار کر سکتی ہیں۔ ویڈیو کی شروعات میں لیڈی گاگا کو گلابی فیس ماسک اتارتے دیکھا جا سکتا ہے، جس کے بعد انہوں نے آنکھوں کے نیچے، ماتھے اور منہ کے اطراف کنسیلر کا استعمال کیا۔ کنسیلر بلینڈ کرنے کے بعد انہوں نے گالوں، پلکوں، جبڑے اور ناک پر کونٹورنگ کی اور آخر میں براؤن لپ لائنر لگا کر اپنا لُک مکمل کیا۔

لیڈی گاگا نے ان تین مصنوعات یعنی کنسیلر، کونٹور اور لپ لائنر کے مجموعے کو ’مائی ہولی ٹرینیٹی‘ (My Holy Trinity) کا نام دیا ہے۔ ان کا کہنا تھا کہ وقت کی کمی کی صورت میں یہ تین بنیادی چیزیں انہیں چند سیکنڈز میں فوری اور شاندار انداز فراہم کرنے کے لیے کافی ہوتی ہیں۔ لیڈی گاگا کا یہ مختصر اور سادگی سے بھرپور انداز سوشل میڈیا پر مداحوں کی جانب سے بے حد پسند کیا جا رہا ہے۔