کورولوش عثمان کے اداکار سرحات مصطفیٰ کیلیچ 51 برس کی عمر میں چل بسے

ترک ڈرامہ سیریل ‘کورولوش عثمان’ میں ‘میخائل کوسس’ کا معروف کردار ادا کرنے والے 51 سالہ ترک اداکار سرحات مصطفیٰ کیلیچ استنبول میں واقع اپنے گھر میں پراسرار طور پر مردہ حالت میں پائے گئے ہیں۔ ترک میڈیا رپورٹس کے مطابق 5 ستمبر کو استنبول کے ضلع کاگتھانے میں واقع ان کے اپارٹمنٹ میں ان کی دوست اوزلم ای نے انہیں بے حس و حرکت دیکھا۔ اوزلم ای دو دنوں سے اداکار سے رابطہ کرنے کی کوشش کر رہی تھیں، لیکن جواب نہ ملنے پر وہ چابی کے ذریعے گھر کے اندر داخل ہوئیں جہاں وہ کرسی پر بے ہوش پڑے تھے۔ اطلاع ملنے پر طبی ٹیم نے موقع پر پہنچ کر ان کے انتقال کی تصدیق کر دی۔ پولیس نے ابتدائی معائنے کے بعد واقعے کی تحقیقات شروع کر دی ہیں جبکہ میت کو پوسٹ مارٹم کے لیے اسپتال منتقل کر دیا گیا ہے۔ اداکار کی دوست نے پولیس کو بتایا ہے کہ وہ لمفک کینسر (Lymphoma) میں مبتلا تھے۔ 1975ء میں پیدا ہونے والے سرحات مصطفیٰ نے 1998ء میں تھیٹر سے اپنے فنی سفر کا آغاز کیا تھا؛ ان کی فلم ‘کچ یوکوسو’ کو 2014ء میں کانز فلم فیسٹیول میں ایوارڈ سے بھی نوازا گیا تھا، جبکہ وہ ‘سوز’ اور ‘کورولوش عثمان’ جیسے مقبول ترین ڈراموں کے ذریعے دنیا بھر میں شہرت رکھتے تھے۔