ایران امریکا کشیدگی اور معاشی غیر یقینی سے KSE-100 میں ہفتہ وار مندی

کراچی: پاکستان اسٹاک ایکسچینج (PSX) کے لیے رواں کاروباری ہفتہ انتہائی مایوس کن رہا، جہاں عالمی سیاسی کشیدگی اور معاشی غیر یقینی کے باعث مندی کا رجحان غالب رہا۔ ایران اور امریکا کے درمیان جاری جنگ اور خام تیل کی بڑھتی ہوئی قیمتوں نے سرمایہ کاروں کے اعتماد کو ٹھیس پہنچائی، جس کے نتیجے میں ادارہ شماریات اور اسٹیٹ بینک کے مثبت معاشی اعشاریے بھی مارکیٹ کو سہارا دینے میں ناکام رہے۔

چار روزہ کاروباری ہفتے کے اختتام پر 100 انڈیکس میں مجموعی طور پر 1,126 پوائنٹس کی کمی ریکارڈ کی گئی، جو کہ 0.73 فیصد تنزلی کو ظاہر کرتی ہے۔ انڈیکس ہفتے کے اختتام پر 152,740 پوائنٹس کی سطح پر بند ہوا۔ کاروباری ہفتے کے دوران انڈیکس نے 154,684 کی بلند ترین اور 148,509 کی کم ترین سطح کو چھوا۔

اس مندی کے باعث سرمایہ کاروں کو مجموعی طور پر 261 ارب 52 کروڑ روپے کا بھاری نقصان اٹھانا پڑا، جبکہ مارکیٹ کیپیٹلائزیشن کم ہو کر 17 ہزار 68 ارب روپے پر آ گئی۔ مارکیٹ میں تجارتی سرگرمیاں بھی ماند رہیں اور اوسط یومیہ حجم 29 فیصد کمی کے ساتھ 32 کروڑ شیئرز رہا، جبکہ تجارتی مالیت بھی 25 فیصد گر کر 7 کروڑ 10 لاکھ ڈالر ریکارڈ کی گئی۔