کومل عزیز نے اداکاری کو اپنی کم عمری میں تفریح کا ذریعہ قرار دے دیا

پاکستانی اداکارہ اور کامیاب کاروباری شخصیت کومل عزیز نے کہا ہے کہ اداکاری ان کی کم عمری میں تفریح کا ذریعہ تھی، جبکہ اب بزنس میں انہیں زیادہ تسکین اور مواقع ملتے ہیں۔

کومل عزیز نے حال ہی میں فوٹو اینڈ ویڈیو شیئرنگ ایپ انسٹاگرام پر سوال و جواب کا سیشن رکھا، جہاں ایک مداح نے ان سے پوچھا کہ انہیں اداکاری میں زیادہ مزہ آتا تھا یا کاروبار میں؟ اس کے جواب میں اداکارہ نے کہا کہ بزنس میں انہیں زیادہ دلچسپی ہے کیونکہ اس میں دماغی صلاحیتوں کا بہتر استعمال اور پیچیدہ مسائل حل کرنے کا موقع ملتا ہے۔

انہوں نے کہا کہ کاروبار میں عمر کے ساتھ مارکیٹ ویلیو بڑھتی ہے، جبکہ اداکاری میں ایسا نہیں ہوتا۔ کومل عزیز کے مطابق کم عمری میں شوبز کی چکاچوند، میک اپ، لباس اور گلیمر انہیں بہت پسند تھا، تاہم اب ان کی ترجیحات بدل چکی ہیں۔

واضح رہے کہ کومل عزیز نے ڈرامہ انڈسٹری میں ’’میں نہ جانو‘‘، ’’رازِ الفت‘‘ اور ’’مہلت‘‘ جیسے کامیاب ڈراموں میں اداکاری کے جوہر دکھائے۔ اس وقت وہ اپنا فیشن برانڈ چلا رہی ہیں اور ایک کامیاب کاروباری خاتون کے طور پر خود کو منوا چکی ہیں۔