پیرس عدالت کا کم کارڈیشین کو 1 یورو ہرجانہ دینے کا حکم

فرانسیسی دارالحکومت پیرس کی ایک عدالت نے 2016ء میں مسلح ڈکیتی کا نشانہ بننے والی معروف امریکی اداکارہ و ماڈل کم کارڈیشین (Kim Kardashian) کو بطور ہرجانہ محض ایک یورو ادا کرنے کا حکم دیا ہے۔ غیر ملکی میڈیا کے مطابق یہ علامتی ہرجانہ خود کم کارڈیشین کی درخواست پر دیا گیا ہے، کیونکہ انہوں نے عدالت سے صرف ایک یورو معاوضے کا مطالبہ کیا تھا۔ واضح رہے کہ فرانسیسی عدالت نے گزشتہ برس اس ہائی پروفائل واردات میں ملوث 8 ملزمان کو مجرم قرار دیا تھا۔

کم کارڈیشین اور ان کی اسٹائلسٹ سیمون ہاروش نے ایک مشترکہ بیان میں فرانسیسی نظامِ انصاف کا شکریہ ادا کرتے ہوئے کہا کہ ان کے لیے یہ معاملہ کسی مالی معاوضے کے بجائے جواب دہی، سچائی اور انصاف کے قیام سے متعلق تھا۔ انہوں نے اعتراف کیا کہ اس خوفناک واقعے کے اثرات اور صدمہ طویل عرصے تک ان کے ساتھ رہے، تاہم اب وہ اس باب کو بند کر کے اپنی زندگی میں آگے بڑھ رہی ہیں۔ یاد رہے کہ اکتوبر 2016ء میں پیرس فیشن ویک کے دوران ڈاکوؤں نے ‘ہوٹل ڈی پورٹالیس’ میں کم کارڈیشین کو گن پوائنٹ پر یرغمال بنا کر کروڑوں ڈالرز کے قیمتی زیورات لوٹ لیے تھے۔ عدالت نے اسی کیس میں ہوٹل کے سابق ریسپشنسٹ کو بھی ذہنی صدمے کے بدلے 1 لاکھ 9 ہزار 516 یورو ہرجانہ ادا کرنے کا حکم جاری کیا ہے۔