آسٹریلوی اداکارہ کے کیٹی پیری پر ہراسانی کے سنگین الزامات، پولیس کی تحقیقات

عالمی شہرت یافتہ امریکی گلوکارہ کیٹی پیری اس وقت ایک سنگین قانونی تنازعے کی زد میں ہیں، جہاں آسٹریلوی اداکارہ روبی روز نے ان پر نامناسب رویے کے الزامات عائد کیے ہیں۔ ان الزامات کے بعد آسٹریلوی پولیس نے باقاعدہ تحقیقات کا آغاز کر دیا ہے، جس نے شوبز کی دنیا میں ہلچل مچا دی ہے۔

روبی روز نے سوشل میڈیا پر انکشاف کیا کہ یہ واقعہ تقریباً دو دہائی قبل میلبورن کے ایک نائٹ کلب میں پیش آیا تھا۔ اداکارہ کے مطابق، انہوں نے طویل عرصے تک اس واقعے کو اپنے اندر دبائے رکھا، لیکن اب وہ اس صدمے سے باہر نکلنے اور سچ سامنے لانے کے لیے پرعزم ہیں۔ روبی روز نے 14 اپریل کو آگاہ کیا کہ وہ اپنی رپورٹ درج کرا چکی ہیں اور اب پولیس کی ہدایت پر اس معاملے پر مزید عوامی بیان بازی سے گریز کریں گی۔

دوسری جانب کیٹی پیری کی قانونی ٹیم نے ان تمام الزامات کو قطعی طور پر مسترد کرتے ہوئے انہیں “بے بنیاد اور خطرناک جھوٹ” قرار دیا ہے۔ ان کے نمائندوں کا موقف ہے کہ روبی روز ماضی میں بھی مختلف نامور شخصیات پر اسی نوعیت کے الزامات لگا چکی ہیں جو ثابت نہیں ہو سکے۔ فی الحال میلبورن پولیس کی خصوصی انویسٹی گیشن ٹیم (جنسی ہراسانی اور بچوں کا استحصال یونٹ) 2010 کے اس مبینہ واقعے کی چھان بین کر رہی ہے، اور تحقیقات مکمل ہونے تک مزید تفصیلات کو خفیہ رکھا گیا ہے۔