کترینہ کیف اور وکی کوشل نے پیدائش کے 2 ماہ بعد اپنے بیٹے کے نام کا اعلان کر دیا

بالی وڈ کی معروف جوڑی کترینہ کیف اور وکی کوشل نے اپنے پہلے بیٹے کی پیدائش کے دو ماہ بعد اس کے نام کا باضابطہ اعلان کر دیا ہے۔

کترینہ کیف اور وکی کوشل کے ہاں گزشتہ سال 7 نومبر کو شادی کے چار برس بعد پہلے بچے کی پیدائش ہوئی تھی۔ اب 7 جنوری کو دونوں نے انسٹاگرام پر ایک پوسٹ کے ذریعے اپنے بیٹے کے نام اور پہلی جھلک مداحوں کے ساتھ شیئر کی۔

جوڑے کے مطابق انہوں نے اپنے بیٹے کا نام ویہان کوشل رکھا ہے۔ انسٹاگرام پوسٹ کے کیپشن میں کترینہ اور وکی نے لکھا،
“ہماری روشنی کی کرن، ویہان کوشل۔ دعائیں قبول ہو گئیں، زندگی بہت خوبصورت ہے۔ ہماری دنیا ایک لمحے میں بدل گئی۔”

واضح رہے کہ کترینہ کیف اور وکی کوشل نے 9 دسمبر 2021 کو راجستھان کے ایک ریزورٹ میں شاہی مگر نجی تقریب میں شادی کی تھی، جس میں صرف قریبی رشتہ داروں اور دوستوں نے شرکت کی تھی۔ یہ جوڑی اپنی نجی زندگی کو زیادہ تر میڈیا سے دور رکھتی ہے، تاہم مداحوں نے بیٹے کے نام کے اعلان پر خوشی اور مبارکباد کے پیغامات دیے ہیں۔