غزہ میں جنگ بندی کی حمایت پر کام چھین لیا گیا: کیٹ بیکنسیل

ہالی ووڈ کی معروف اداکارہ کیٹ بیکنسل نے انکشاف کیا ہے کہ غزہ میں جنگ بندی کی حمایت اور بچوں کے قتل کے خلاف ایک سوشل میڈیا پوسٹ لائک کرنے پر ان کی ایجنٹ نے انہیں فوری طور پر کام سے فارغ کر دیا۔ انسٹاگرام پر حذف شدہ تبصروں میں اداکارہ نے بتایا کہ یہ واقعہ 2023 کی ایکٹرز ہڑتال ختم ہونے کے محض دو دن بعد پیش آیا، جب انہیں اسی ایجنٹ نے نکالا جس نے ان کے بقول اداکار مارک روفالو کو برقرار رکھا۔ کیٹ بیکنسل نے ‘انڈر ورلڈ’ فلم سے شہرت حاصل کی، انہوں نے مارک روفالو کو مخاطب کرتے ہوئے کہا کہ انہوں نے اس ناانصافی پر نجی طور پر رابطہ کرنے کی کوشش کی مگر اداکار نے انہیں مکمل طور پر نظر انداز کر دیا۔

اداکارہ نے اپنی ذاتی زندگی کے کربناک دور کا ذکر کرتے ہوئے بتایا کہ جس وقت انہیں 12 سالہ رفاقت کے بعد ایجنٹ نے محض دو جملوں کے ذریعے نکالا، وہ اپنی والدہ کے کینسر اور سوتیلے والد کے انتقال جیسی شدید مشکلات سے گزر رہی تھیں۔ انہوں نے اپنے کیس کا موازنہ سینئر اداکارہ سوزن سیرینڈن سے بھی کیا، جنہیں فلسطینیوں کے حق میں آواز اٹھانے پر ٹیلنٹ ایجنسی نے فارغ کر دیا تھا۔ کیٹ بیکنسل کا کہنا ہے کہ انڈسٹری میں انسانی حقوق کے لیے آواز اٹھانے کی قیمت انہیں پیشہ ورانہ بائیکاٹ کی صورت میں چکانی پڑی ہے، جبکہ ان کے ساتھی اداکار اس معاملے پر خاموشی اختیار کیے ہوئے ہیں۔