کامیڈین کاشف خان نے بیٹیوں کی شادی پر فضول خرچے سے بچنے کا طریقہ بتادیا

کراچی: معروف کامیڈین کاشف خان نے حال ہی میں ایک نجی ٹی وی کی رمضان ٹرانسمیشن میں شرکت کی، جہاں انہوں نے اپنی بیٹی اور مشہور سوشل میڈیا انفلوئنسر ربیکا خان کی شادی کے بعد بڑھتے ہوئے اخراجات اور فضول خرچی سے بچنے کے عملی طریقے بتائے۔ میزبان کے سوال کا جواب دیتے ہوئے کاشف خان کا کہنا تھا کہ ہر انسان کی خواہش ہوتی ہے کہ وہ پہلی شادی دھوم دھام سے کرے، لیکن خواہشات کے ساتھ ساتھ اخراجات میں توازن رکھنا ضروری ہے۔

کاشف خان نے مشورہ دیا کہ مہنگے عروسی لباس اور قیمتی جیولری خریدنے کے بجائے انہیں کرائے پر حاصل کرنا ایک بہتر آپشن ہے، کیونکہ آج کل ڈیزائنر جوڑے اور سونے چاندی کے زیورات بھی آسانی سے کرائے پر دستیاب ہیں۔ انہوں نے مزید کہا کہ “مہندی” اور “شادی” کی تقریبات کو ملا کر ایک ہی تقریب یعنی “شیندی” منعقد کرنے سے بھی لاکھوں روپے بچائے جا سکتے ہیں۔

لڑکے والوں کو تحائف دینے کے حوالے سے انہوں نے واضح کیا کہ ان کی بیٹی کی شادی میں یہ پہلے ہی طے کر لیا گیا تھا کہ ہر فریق اپنی اپنی ذمہ داریاں پوری کرے گا۔ ان کا کہنا تھا کہ اب خاندان بھر کو کپڑے دینے کا رواج ختم ہو چکا ہے اور لوگ اب زیادہ عملی سوچ اپنا رہے ہیں۔ واضح رہے کہ ربیکا خان کی شادی کی طویل تقریبات پر سوشل میڈیا پر کافی تنقید کی گئی تھی، جس کے تناظر میں کاشف خان کا یہ بیان اہمیت اختیار کر گیا ہے۔