کراچی میں پہلی ہی بارش قیامت بن گئی، شوبز شخصیات کا شدید ردعمل

کراچی: ملک کے دیگر حصوں کی طرح کراچی میں بھی مون سون کی پہلی بارش نے قدم جمائے، مگر گرج چمک کے ساتھ ہونے والی اس پہلی ہی برسات نے شہرِ قائد کے انفرااسٹرکچر کی قلعی کھول دی ہے۔ گزشتہ رات ہونے والی شدید بارش اور آندھی کے نتیجے میں مختلف حادثات میں 15 سے زائد افراد جاں بحق اور متعدد زخمی ہو گئے، جبکہ نظامِ زندگی مفلوج ہو کر رہ گیا ہے۔

تیز ہواؤں اور بارش نے چاند رات کی مناسبت سے منعقدہ بڑے ایونٹ ’’کراچی کامنز‘‘ کو بھی شدید نقصان پہنچایا، جہاں اسٹالز اور سجاوٹ کا سامان اڑ گیا، جبکہ حیدری مارکیٹ سمیت شہر کے دیگر تجارتی مراکز میں پانی جمع ہونے سے کروڑوں کا نقصان ہوا ہے۔ اس ہنگامی صورتحال نے شوبز انڈسٹری کو بھی متاثر کیا؛ معروف اداکارہ ماہرہ خان اور فہد مصطفیٰ شوٹنگ سے واپسی پر گھنٹوں ٹریفک اور پانی میں پھنسے رہے، جس پر انہوں نے سوشل میڈیا کے ذریعے شہر کی ابتر صورتحال پر گہری تشویش کا اظہار کیا۔

فنکاروں اور شہریوں نے حکام سے مطالبہ کیا ہے کہ ہر سال بارش کے بعد پیدا ہونے والی اس سنگین صورتحال کا مستقل حل نکالا جائے اور شہر کے نکاسیِ آب کے نظام کو ہنگامی بنیادوں پر بہتر بنایا جائے تاکہ قیمتی جانوں اور املاک کے ضیاع کو روکا جا سکے۔