جماعت اسلامی بنگلادیش نے عام انتخابات کے نتائج قبول کرنے کا اعلان کردیا

بنگلا دیش جماعت اسلامی نے انتخابات کےکے نتائج قبول کرتے ہوئےذمے داراپوزیشن کا کردار ادا کرنے کا اعلان کیا ہے۔ بنگلہ دیشی میڈیاکے مطابق امیر جماعت اسلامی ڈاکٹر شفیق الرحمٰن نے سوشل میڈیا پربیان میں کہا کہ ہم مجموعی نتائج قبول کرتے ہیں اور قانون کی حکمرانی کا احترام کرتے ہیں، جماعت اسلامی ہمیشہ مستحکم اور مؤثر جمہوری نظام کے لیے پرعزم رہی ہے اور وہ اس موقف پر قائم ہے۔

انہوں نے پارٹی کےکارکنوں اور حامیوں کا شکریہ ادا کرتے ہوئے کہا کہ اگرچہ بعض افراد مایوس ہو سکتے ہیں مگر ان کی کوششیں رائیگاں نہیں گئیں، کیونکہ 77 نشستوں پر کامیابی نے پارٹی کی پارلیمنٹ میں موجودگی کو تقریباً چار گنا بڑھا دیا ہے اور اسے مضبوط اپوزیشن  بنایا ہے، یہ شکست نہیں بلکہ بنیاد ہے۔

ڈاکٹر شفیق الرحمٰن نے یہ بھی کہا کہ سیاسی تقدیر بدل سکتی ہے، جیسا کہ بنگلہ دیش نیشنل پارٹی 2008 میں صرف 30 نشستوں تک محدود رہی لیکن بعد میں 18 سال بعد حکومت بنائی۔ جمہوری سیاست ایک طویل سفر ہے جس کا مقصد عوام کا اعتماد حاصل کرنا، جواب دہی کو یقینی بنانا اور مستقبل کے لیے ذمے داری سے تیاری کرنا ہے۔