یوٹیوب پر فالوورز نہ بڑھے،نوجوان نے سٹوڈیو کو آگ لگا دی

بھارت کے جھارکھنڈ میں ایک 27 سالہ نوجوان یوٹیوبر ودھایک پراجاپتی نے فالوورز نہ بڑھنے کی وجہ سے شدید ذہنی دباؤ کے باعث اپنے گھر کے اندر 10 لاکھ روپے کے سٹوڈیو میں آگ لگا دی۔

رپورٹس کے مطابق ودھایک نے اپنی زمین فروخت کر کے جدید سٹوڈیو قائم کیا اور امید کی کہ محنت کے ذریعے یوٹیوب پر مقبولیت حاصل کریں گے، تاہم کئی مہینوں کی کوشش کے باوجود مطلوبہ فالوورز نہ بڑھنے کی وجہ سے وہ ذہنی دباؤ کا شکار ہو گئے۔حادثے کی رات تقریباً 10 بجے ودھایک نے سٹوڈیو میں خود کو بند کر کے آگ لگا دی۔ دھواں پورے گھر میں پھیل گیا اور لوہے کے بند دروازے کی وجہ سے خاندان اندر پھنس گیا۔ پڑوسیوں کی اطلاع پر پولیس نے دیوار توڑ کر اہل خانہ کو محفوظ باہر نکالا۔سٹوڈیو میں موجود کمپیوٹر، کیمرے، ساؤنڈ سسٹمز اور لائٹنگ کے تمام آلات مکمل طور پر جل گئے۔ آگ لگانے کے بعد ودھایک نے چھلانگ لگا کر اپنی جان بچائی اور بعد ازاں رانچی کے ایک ہسپتال میں نفسیاتی علاج کے لیے داخل ہو گئے۔ماہرین کے مطابق یہ واقعہ نوجوانوں میں سوشل میڈیا اور ڈیجیٹل پلیٹ فارمز کے دباؤ کے خطرات کو اجاگر کرتا ہے، جہاں کامیابی کی دوڑ بعض اوقات ذہنی صحت کے لیے نقصان دہ ثابت ہو سکتی ہے۔