نیا چیٹ جی پی ٹی دنیا کا پہلا انسانی سطح کااے آئی ماڈل قرار

امریکی ٹیکنالوجی کمپنی این ویڈیا کے چیف ایگزیکٹو آفیسر جینسن ہوانگ نے دعویٰ کیا ہے کہ چیٹ جی پی ٹی کا تازہ ترین ورژن آرٹیفیشل جنرل انٹیلی جنس (اے جی آئی) کی پہلی مثال ہے، جسے انسانی سطح کی مصنوعی ذہانت بھی قرار دیا جاتا ہے۔

رپورٹ کے مطابق اوپن اے آئی نے گزشتہ ہفتے اپنا نیا جی پی ٹی-6 ماڈل متعارف کرایا، جسے چیٹ جی پی ٹی آسٹرا کا نام دیا گیا ہے۔ نئے ماڈل نے مختلف بینچ مارک ٹیسٹس میں متاثر کن کارکردگی کا مظاہرہ کیا، جس کے باعث اسے اینتھروپک کے کلاؤڈ اور گوگل کے جیمینائی جیسے حریف ماڈلز کے مقابلے میں نمایاں قرار دیا جا رہا ہے۔

اوپن اے آئی کے مطابق نئے ماڈل میں کمپیوٹر استعمال کرنے، ویب براؤزنگ، سافٹ ویئر انجینئرنگ، سائبر سیکیورٹی، سائنسی اور پیشہ ورانہ امور انجام دینے کی جدید صلاحیتیں موجود ہیں، جبکہ یہ بیک وقت متعدد پیچیدہ کام خودمختاری سے مکمل کرنے کی صلاحیت بھی رکھتا ہے۔

ایک مظاہرے کے دوران نئے اے آئی ماڈل نے صارف کی درخواستوں کا جواب دینے کے ساتھ ساتھ پیچیدہ کام بھی بیک وقت انجام دیے، جن میں ویڈیو گیم تیار کرنا اور قانونی دستاویز مرتب کرنا شامل تھا۔

نئے ماڈل کی رونمائی کے بعد این ویڈیا کے سی ای او جینسن ہوانگ نے سماجی رابطے کے پلیٹ فارم ایکس پر اوپن اے آئی ٹیم کو مبارکباد دیتے ہوئے کہا کہ ’’اے جی آئی آ چکی ہے‘‘۔

تاہم اے جی آئی کی تعریف اور یہ دعویٰ کہ موجودہ اے آئی ماڈلز انسانی سطح کی عمومی ذہانت تک پہنچ چکے ہیں، ٹیکنالوجی کے ماہرین کے درمیان اب بھی ایک اہم بحث کا موضوع ہے۔