جیفری ایپسٹین کے خواتین کو قابو کرنے کے نفسیاتی و مالی حربے بے نقاب

نیویارک: بدنامِ زمانہ امریکی ارب پتی جیفری ایپسٹین کے ہاتھوں جنسی اور نفسیاتی استحصال کا شکار ہونے والی خاتون جولیا مولچانووا پہلی بار علانیہ منظرِ عام پر آ گئی ہیں اور انہوں نے ایپسٹین کے طریقۂ کار اور مالی و جذباتی بلیک میلنگ کے بارے میں سنسنی خیز انکشافات کیے ہیں۔

دی وال اسٹریٹ جرنل کو دیے گئے خصوصی انٹرویو میں جولیا مولچانووا نے بتایا کہ ایپسٹین اپنے گھروں اور اپارٹمنٹس میں موجود یرغمال یا متاثرہ خواتین کے لیے ‘اسسٹنٹ’ کی اصطلاح استعمال کرتا تھا تاکہ قانونی چھتری کے تحت جنسی و جسمانی زیادتی کو چھپایا جا سکے۔ جولیا کے مطابق، 22 سال کی عمر میں روس سے نیویارک آمد پر ایپسٹین نے فیشن انڈسٹری میں کیریئر اور تعلیمی داخلے کا جھانسہ دے کر انہیں اپنے دامِ فریب میں جکڑا اور بعد ازاں ایک اپارٹمنٹ میں منتقل کر دیا جہاں دیگر خواتین بھی موجود تھیں۔

جولیا مولچانووا نے انکشاف کیا کہ ایپسٹین خواتین کو مکمل طور پر اپنے کنٹرول میں رکھنے کے لیے ان کے لباس، بالوں کی تراش خراش اور وزن تک کی ہدایات دیتا تھا، جبکہ ان کے نام پر جاری کردہ کریڈٹ کارڈز، لیپ ٹاپس اور فونز کی مکمل مالی و دیجیتل نگرانی کی جاتی تھی۔ انکار کی صورت میں 24 گھنٹے تک کمروں میں قید رکھنے اور دوستوں و خاندان سے کاٹ دینے کی سزائیں دی جاتی تھیں۔ انہوں نے بتایا کہ بااثر سیاسی و معاشی شخصیت ہونے کے باعث ایپسٹین کے خلاف پولیس یا حکام سے رجوع کرنا جان لیوا خطرہ سمجھا جاتا تھا۔