جواد احمد خواتین کے پردے سے متعلق بیان پر شدید تنقید کی زد میں

گلوکار اور سماجی کارکن جواد احمد خواتین کے پردے سے متعلق متنازع بیان دینے کے بعد سوشل میڈیا پر شدید تنقید کی زد میں آ گئے ہیں۔

تفصیلات کے مطابق جواد احمد حال ہی میں ایک پوڈکاسٹ میں شریک تھے جہاں ایک خاتون سامع سے گفتگو کے دوران تلخ کلامی ہو گئی۔ مبینہ طور پر خاتون نے جواد احمد کے خیالات پر تنقید کی، جس پر انہوں نے سخت ردِعمل دیتے ہوئے کہا کہ تنقید کرنے سے قبل اپنے طرزِ عمل کا بھی جائزہ لینا چاہیے۔

پوڈکاسٹ کے دوران جواد احمد کا کہنا تھا کہ ان جیسے لوگوں کی جدوجہد کی بدولت آج خواتین کو اپنی مرضی کے مطابق زندگی گزارنے کا اختیار حاصل ہوا ہے۔

تاہم گفتگو کے دوران جواد احمد نے ایک مثال دیتے ہوئے کہا کہ عمران خان کی اہلیہ برقع پہنتی ہیں، ان کی بہنیں سر ڈھانپتی ہیں، اور اگر ماہرہ خان برقع پہنیں گی تو وہ ڈانس کیسے کریں گی؟

ان کا یہ بیان سوشل میڈیا پر وائرل ہوتے ہی صارفین کی جانب سے شدید ردِعمل سامنے آیا۔ کئی صارفین نے جواد احمد کے اندازِ گفتگو اور الفاظ کے انتخاب پر تنقید کرتے ہوئے کہا کہ انہیں اختلافِ رائے کے باوجود دوسروں سے بات کرنے کا سلیقہ اختیار کرنا چاہیے۔

سوشل میڈیا پر بعض حلقوں کا کہنا تھا کہ خواتین کے لباس اور ذاتی فیصلوں کو اس انداز میں موضوع بنانا نامناسب ہے، جبکہ کچھ صارفین نے بیان کو غیر ذمہ دارانہ قرار دیا۔