’یہ بالکل بھی مذاق نہیں‘، اپنی جعلی اے آئی ویڈیو دیکھ کر جنت مرزا بھڑک اٹھیں

پاکستان کی معروف ٹک ٹاکر اور سوشل میڈیا انفلوئنسر جنت مرزا نے اپنی ایک جعلی آرٹیفیشل انٹیلی جنس (AI) سے تیار کردہ ویڈیو پر شدید غصے اور ناراضی کا اظہار کیا ہے۔ انہوں نے بغیر اجازت کسی بھی خاتون کا چہرہ ڈیپ فیک اور اے آئی تکنیک کے ذریعے استعمال کرنے کو ان کی عزت اور پرائیویسی کے لیے بڑا خطرہ قرار دیا ہے۔ سوشل میڈیا پر وائرل ہونے والی اس جعلی ویڈیو میں جنت مرزا کو ایک نامعلوم شخص کے ساتھ دکھایا گیا ہے جبکہ پس منظر میں ’اچھی لگتی ہو‘ گانا چلایا گیا ہے۔

جنت مرزا نے اس وائرل ویڈیو کو اپنی انسٹاگرام اسٹوری پر ری شیئر کرتے ہوئے سخت احتجاج درج کرایا۔ انہوں نے لکھا کہ ’’یہ ویڈیو بالکل بھی کوئی مذاق نہیں ہے اور کسی کا بھی چہرہ اس طرح استعمال کر کے ویڈیوز بنانا انتہائی تشویشناک امر ہے۔ آج میرا چہرہ استعمال ہوا ہے، کل کو کسی اور لڑکی کی تصویر کا غلط استعمال کیا جا سکتا ہے۔‘‘ انہوں نے مزید کہا کہ سوشل میڈیا پر باقاعدہ متحرک رہنے کے باوجود اس طرح کی جعلسازی دیکھ کر وہ خود سخت ذہنی اذیت سے گزریں، تو ان عام لڑکیوں کے لیے یہ صورتِ حال کتنی پریشان کن ہو سکتی ہے جو سوشل میڈیا کا حصہ بھی نہیں لیکن ان کی تصاویر کا انہیں بتائے بغیر غلط استعمال کیا جا سکتا ہے