’یہ بالکل بھی مذاق نہیں‘، اپنی جعلی اے آئی ویڈیو دیکھ کر جنت مرزا بھڑک اٹھیں

پاکستان کی معروف ٹک ٹاکر اور سوشل میڈیا انفلوئنسر جنت مرزا نے اپنے چہرے کو استعمال کرتے ہوئے بنائی گئی ایک جعلی آرٹیفیشل انٹیلی جنس (AI) ویڈیو پر شدید برہم ہوتے ہوئے اسے خواتین کی عزت اور پرائیویسی کے لیے بڑا خطرہ قرار دیا ہے۔ سوشل میڈیا پر وائرل ہونے والی اس اے آئی سے تیار کردہ ویڈیو میں جنت مرزا کو ایک نامعلوم شخص کے ساتھ دکھایا گیا ہے جبکہ پس منظر میں ‘اچھی لگتی ہو’ گانا چل رہا ہے۔

جنت مرزا نے اس جعلی ویڈیو کا اسکرین شاٹ اپنی انسٹاگرام اسٹوری پر شیئر کرتے ہوئے لکھا کہ “یہ ویڈیو بالکل بھی مذاق نہیں ہے، کسی کا چہرہ اس کی اجازت کے بغیر استعمال کر کے ایسی ویڈیوز بنانا انتہائی تشویشناک اور ہولناک ہے۔ آج میرا چہرہ غلط طریقے سے استعمال ہوا ہے لیکن کل کو کسی بھی اور لڑکی کی تصاویر کا اسی طرح غلط استعمال ہو سکتا ہے۔”

انہوں نے مزید کہا کہ سوشل میڈیا پر ہر وقت متحرک رہنے کے باوجود یہ ویڈیو دیکھ کر وہ خود شدید ذہنی کوفت اور پریشانی کا شکار ہوئی ہیں۔ انہوں نے سوال اٹھایا کہ ان لڑکیوں کے لیے یہ صورتحال کتنی خوفناک اور اذیت ناک ہو سکتی ہے جو سوشل میڈیا پر موجود بھی نہیں ہیں، لیکن ان کی تصاویر کو ان کی علم میں لائے بغیر اس طرح کے ایڈیٹڈ مواد میں استعمال کیا جا سکتا ہے۔