دنیا کیلئے آخری تحفہ، جیکی چن نے مرنے کے بعد ریلیز ہونے والا گانا ریکارڈ کرا دیا

بیجنگ: عالمی شہرت یافتہ ہالی ووڈ اداکار اور مارشل آرٹس لیجنڈ جیکی چن نے انکشاف کیا ہے کہ انہوں نے ایک خصوصی گانا ریکارڈ کر لیا ہے جو ان کے انتقال کے بعد دنیا کے سامنے لایا جائے گا۔

غیر ملکی خبر رساں ایجنسی کے مطابق جیکی چن نے اپنی نئی ڈرامہ فلم “ان ایکسپیکٹڈ فیملی” کے پریمیئر کے موقع پر بتایا کہ یہ گانا ان کا آخری پیغام ہوگا۔

جیکی چن نے کہا کہ قریبی دوستوں اور عزیزوں کی وفات نے انہیں زندگی پر گہرے غور و فکر پر مجبور کیا، اور اس کے بعد انہوں نے یہ محسوس کیا کہ انسان کو اپنے جذبات اور خیالات کو بروقت بیان کرنا چاہیے۔

انہوں نے بتایا کہ اپنے دل کی باتیں اور آخری احساسات موسیقی کی شکل میں محفوظ کر لیے ہیں، لیکن خاندان اور انتظامیہ کی خواہش کے مطابق یہ گانا فی الحال ریلیز نہیں کیا جائے گا۔

جیکی چن نے مزید کہا کہ ماضی میں وہ خطرناک اسٹنٹس کے دوران کم عمری میں لیجنڈ بننے کے تصور سے متاثر تھے، لیکن اب ان کی سوچ بدل چکی ہے اور وہ زندگی کو مختلف زاویے سے دیکھتے ہیں۔