اسرائیلی فوجیوں کا فلسطینی قیدی پر تشدد؛ سوشل میڈیا پر وائرل تصویر نے کہرام مچادیا

سوشل میڈیا پر ہونے والے شدید عالمی احتجاج نے اسرائیلی حکومت اور عسکری قیادت کو بالآخر ان فوجیوں کے خلاف کارروائی اور تحقیقات شروع کرنے پر مجبور کر دیا ہے، جنہوں نے ایک فلسطینی قیدی پر ظلم و تشدد کی تمام حدیں پار کر دی تھیں۔

عالمی خبر رساں ادارے کے مطابق، اسرائیلی فوج نے باقاعدہ تصدیق کی ہے کہ سوشل میڈیا پر وائرل ہونے والی اس لرزہ خیز تصویر میں قیدی پر بدترین تشدد کرنے والے فوجی اہلکاروں کی شناخت کر لی گئی ہے۔ انٹرنیٹ پر وائرل ہونے والی اس تصویر میں دیکھا جا سکتا ہے کہ ایک شخص کی آنکھوں پر پٹی بندھی ہوئی ہے، اس کے ہاتھ اور پاؤں بستر کے ساتھ جکڑے گئے ہیں اور اسرائیلی فوجی اہلکار اس بے بس قیدی پر تشدد کر رہے ہیں۔ تصویر سامنے آنے پر انسانی حقوق کی تنظیموں اور سوشل میڈیا صارفین کی جانب سے شدید ردعمل سامنے آیا تھا۔

اسرائیلی فوج کے ترجمان نے اپنے ایک بیان میں کہا ہے کہ واقعے کی مکمل اور باریک بینی سے جانچ پڑتال کے بعد اس مکروہ فعل میں ملوث اہلکاروں کا سراغ لگا لیا گیا ہے اور ان کے متعلقہ کمانڈرز کی جانب سے باضابطہ تحقیقات کا آغاز کر دیا گیا ہے۔ عسکری بیان میں دعویٰ کیا گیا ہے کہ انکوائری مکمل ہونے کے بعد ذمہ دار اہلکاروں کے خلاف نتائج کی روشنی میں مناسب قانونی کارروائی کی جائے گی۔

دوسری جانب، اسرائیلی ترجمان نے یہ دفاعی مؤقف بھی اپنایا کہ اسرائیل مخالف بعض سوشل میڈیا اکاؤنٹس کا یہ دعویٰ سراسر جھوٹا ہے کہ یہ تصویر شمالی غزہ میں ‘کفیر بریگیڈ’ کی ‘نیتزاح یہودا بٹالین’ کی کارروائی کے دوران لی گئی تھی۔ بیان میں کہا گیا ہے کہ تصویر کو اس مخصوص ملٹری آپریشن سے جوڑنا غلط معلومات پر مبنی ہے۔ تاہم، ہمیشہ کی طرح اسرائیلی فوج نے اس واقعے کی مزید تفصیلات، متاثرہ فلسطینی شخص کی شناخت، اور واقعے کے اصل مقام یا وقت کے بارے میں کوئی بھی معلومات جاری کرنے سے گریز کیا ہے اور یہ بھی واضح نہیں کیا کہ یہ تصویر کس آپریشن کے دوران کھینچی گئی تھی۔