خلع کے حق مہر سے متعلق اسلام آباد ہائیکورٹ کا اہم فیصلہ

اسلام آباد ہائیکورٹ نے حق مہر کی رقم اور ۷ تولے سونا واپس لینے سے متعلق شہری کی دائر کردہ آئینی درخواست سماعت کے بعد خارج کر دی ہے۔ جسٹس شاہ رخ ارجمند نے شہری عامر ممتاز کی درخواست پر تحریری فیصلہ جاری کرتے ہوئے قرار دیا کہ نچلی عدالتوں کے فیصلوں میں کوئی قانونی نقص یا بے ضابطگی موجود نہیں ہے، اور آئینی درخواست کو شواہد کی دوبارہ جانچ کے لیے اپیل کے متبادل فورم کے طور پر استعمال نہیں کیا جا سکتا۔

عدالتی فیصلے کے مطابق نکاح نامے میں حق مہر کی رقم ۲ لاکھ ۵۰ ہزار ۱۵۰ روپے درج تھی اور ساتھ میں ادائیگی سونے کے زیورات کی صورت میں تسلیم کی گئی تھی، تاہم نکاح نامے کے متن میں کہیں بھی ۷ تولے سونے کا ذکر موجود نہیں تھا۔ ہائیکورٹ نے اپنے فیصلے میں واضح کیا کہ محض ‘سونے کے زیورات وصول کرنے کا اعتراف’ ان کا مخصوص وزن ثابت کرنے کے لیے کافی نہیں ہے، جبکہ مدعی کی جانب سے ۷ تولے سونا بطورِ حق مہر دینے کا دعویٰ بھی کسی ٹھوس اور قانونی شواہد سے ثابت نہیں ہو سکا۔

درخواست گزار نے عدالت کے سامنے مؤقف اختیار کیا تھا کہ اسے ۷ تولے سونا یا اس کی موجودہ مارکیٹ قیمت کے مطابق رقم واپس دلائی جائے، تاہم ہائیکورٹ نے اس موقف کو رد کرتے ہوئے فیملی کورٹ کا اصل فیصلہ برقرار رکھا، جس کے تحت مدعی کو صرف ۲ لاکھ ۵۰ ہزار ۱۵۰ روپے کی نقد رقم ہی واپس ملے گی۔ اسلام آباد ہائیکورٹ کے اس فیصلے کے بعد نچلی عدالتوں کا حکم نامہ حتمی تصور کیا جائے گا۔