کیوبا میں ایک سال میں ساتواں بلیک آؤٹ، پورا ملک تاریکی میں ڈوب گیا

کیوبا میں پاور گرڈ فیل ہونے کے باعث ملک کا قومی نظامِ بجلی ایک بار پھر مکمل طور پر بیٹھ گیا ہے، جس سے جزیرے بھر میں اندھیرا چھا گیا۔ کیوبا کی وزارتِ توانائی نے ملک گیر بلیک آؤٹ کی باضابطہ تصدیق کر دی ہے، جبکہ سرکاری میڈیا کے مطابق حادثے کی تحقیقات جاری ہیں اور فی الحال بجلی کی مکمل بحالی کے لیے کوئی حتمی وقت نہیں بتایا گیا۔ واضح رہے کہ رواں سال کا یہ ساتواں قومی پاور بریک ڈاؤن ہے جو ملک کے شدید توانائی بحران کی عکاسی کرتا ہے۔

صورتحال کی سنگینی کو دیکھتے ہوئے ہوانا میں قائم امریکی سفارتخانے نے اپنے شہریوں کے لیے ہنگامی الرٹ جاری کرتے ہوئے انہیں بجلی، موبائل فون نیٹ ورک اور انٹرنیٹ کی طویل بندش کے پیشِ نظر احتیاطی تدابیر اور سیکیورٹی منصوبہ بندی کرنے کی ہدایت کی ہے۔ کیوبا میں ایندھن کی شدید قلت، بوسیدہ و پرانے بنیادی ڈھانچے اور امریکی پابندیوں کے باعث برقی ترسیل کا نظام سخت دباؤ کا شکار ہے، جس کی وجہ سے آئے روز غیر اعلانیہ اور طویل لوڈشیڈنگ کے باعث لاکھوں شہری شدید مشکلات سے دوچار ہیں۔