سکیورٹی فورسز کی پنجگور اور چاغی میں کارروائیاں، 11 دہشتگرد ہلاک

بلوچستان میں سیکیورٹی فورسز نے دہشت گرد عناصر کے خلاف بڑی کامیابی حاصل کرتے ہوئے ‘آپریشن ردالفتنہ 3’ کے تحت مختلف علاقوں میں کارروائیاں کر کے فتنہ الہندوستان سے تعلق رکھنے والے 11 دہشت گردوں کو ہلاک کر دیا ہے۔ سیکیورٹی ذرائع کے مطابق یہ مؤثر اور ٹارگٹڈ آپریشنز صوبے کے اضلاع پنجگور اور چاغی میں خفیہ اطلاعات کی بنیاد پر انجام دیے گئے، جہاں فورسز نے دہشت گردوں کے ٹھکانوں کو کامیابی سے نشانہ بنایا۔

تفصیلات کے مطابق پنجگور کے علاقے گوارگو میں سیکیورٹی فورسز کی سخت کارروائی میں 5 دہشت گرد مارے گئے، جبکہ ضلع چاغی کے علاقوں امین آباد اور سیاہ چنگ میں کیے گئے کامیاب آپریشنز کے دوران مزید 6 دہشت گرد ہلاک ہوئے۔ سیکیورٹی ذرائع نے مزید بتایا کہ ہلاک ہونے والے دہشت گردوں کے قبضے اور ٹھکانوں سے بھاری مقدار میں جدید اسلحہ، بارودی مواد اور گولہ بارود بھی برآمد کیا گیا ہے۔ فورسز کا کہنا ہے کہ علاقے میں امن و امان کی بحالی اور دہشت گردی کے مکمل خاتمے تک آپریشنز بلا تعطل جاری رہیں گے۔