اسحاق ڈار اور عباس عراقچی میں رابطہ، بحری جہازوں کی محفوظ آمدورفت پر زور

پاکستان کے نائب وزیرِ اعظم اور وزیرِ خارجہ سناتور اسحاق ڈار اور ایرانی وزیرِ خارجہ سید عباس عراقچی کے درمیان ٹیلی فونک رابطہ ہوا ہے، جس میں خطے کی مجموعی اور تازہ ترین صورتحال پر تفصیلی تبادلہ خیال کیا گیا۔ ترجمان دفترِ خارجہ کے مطابق دونوں رہنماؤں نے علاقائی امن و امان کے ساتھ ساتھ بحری گزرگاہوں اور توانائی کے بین الاقوامی منظرنامے سے متعلق درپیش چیلنجز پر بات چیت کی۔

گفتگو کے دوران نائب وزیرِ اعظم اسحاق ڈار نے توانائی کی بلاتعطل فراہمی اور تجارتی بحری جہازوں کی محفوظ آمدورفت کی اہمیت پر زور دیا، اور واضح کیا کہ بحری مواصلاتی راستوں میں خلل سے ترقی پذیر ممالک اور عالمی سپلائی چینز شدید متاثر ہو سکتی ہیں۔ اسحاق ڈار نے اس بات کا اعادہ کیا کہ خطے میں پائیدار امن و استحکام کو یقینی بنانے کے لیے صرف مذاکرات اور سفارتکاری ہی واحد قابلِ عمل راستے ہیں۔ ترجمان کے مطابق دونوں رہنماؤں نے باہمی مشاورت کا سلسلہ جاری رکھنے کا اعادہ کیا اور اقوامِ متحدہ کی جنرل اسمبلی کے 81ویں اجلاس کے موقع پر نیویارک میں بالمشافہ ملاقات پر اتفاق کیا۔