پی ٹی آئی لانگ مارچ، اہم رابطے کا انکشاف

وفاقی وزیرِ داخلہ محسن نقوی کی سینیٹ میں اپوزیشن لیڈر علامہ راجہ ناصر عباس سے اسلام آباد کے سیکٹر ایف ایٹ (F-8) میں اہم ملاقات ہوئی ہے، جس میں پی ٹی آئی کے مجوزہ لانگ مارچ سمیت سیاسی صورتِ حال پر تبادلۂ خیال کیا گیا۔ ذرائع کے مطابق یہ ملاقات علامہ راجہ ناصر عباس کے ایک قریبی عزیز کی رہائش گاہ پر ہوئی، جس کے لیے ابتدائی رابطہ کاری پاکستان تحریکِ انصاف (پی ٹی آئی) کے چیئرمین بیرسٹر گوہر علی خان نے کی تھی۔

ذرائع کا کہنا ہے کہ بیرسٹر گوہر نے علامہ راجہ ناصر عباس سے رابطہ کر کے پیغام پہنچایا تھا کہ وزیرِ داخلہ محسن نقوی ان سے ملاقات کے خواہشمند ہیں۔ تاہم، علامہ راجہ ناصر عباس نے اپنی ذاتی رہائش گاہ پر وزیرِ داخلہ سے ملنے سے معذرت کی، جس کے بعد دونوں رہنماؤں کے درمیان ایف ایٹ میں واقع نیوٹرل مقام پر ملاقات طے پائی۔

ملاقات کے دوران پاکستان تحریکِ انصاف کے متوقع لانگ مارچ اور سیکیورٹی سے متعلق امور پر بنیادی گفتگو ہوئی۔ تاہم، ذرائع کا بتانا ہے کہ دونوں رہنماؤں کے درمیان ہونے والی اس اہم ملاقات کے دیگر تفصیلی مندرجات اور طے پانے والے دیگر معاملات فوری طور پر منظرِ عام پر نہیں آ سکے۔