عدالتی فائل گمشدگی کیس، سزا پانے والا اہلکار 15 سال بعد بری

لاہور ہائیکورٹ کے جسٹس محمد امجد پرویز نے عدالتی فائل کی گمشدگی کے کیس میں سزا پانے والے عدالتی اہلکار محمد خالد رشید کو ۱۵ سال کی طویل قانونی جنگ کے بعد مقدمے کے تمام الزامات سے باوقار بری کر دیا ہے۔ عدالتِ عالیہ نے ملزم کی اپیل منظور کرتے ہوئے ٹرائل کورٹ کی جانب سے ۲۰۱۸ء میں سنائی گئی ۲ سال قید اور جرمانے کی سزا کا فیصلہ کالعدم قرار دے دیا۔ عدالت نے اپنے فیصلے میں واضح کیا کہ استغاثہ ملزم کے خلاف الزمات ثابت کرنے میں مکمل طور پر ناکام رہا ہے اور یہ کیس کسی بھی قسم کی قانونی شہادت یا ثبوت کے بغیر قائم کیا گیا تھا۔

جسٹس محمد امجد پرویز نے ۱۵ صفحات پر مشتمل تحریری فیصلہ جاری کرتے ہوئے فوجداری قانون کے بنیادی اصول کی وضاحت کی اور قرار دیا کہ کسی بھی شخص پر جرم ثابت کرنے کے لیے اس کی مجرمانہ نیت (Mens Rea) کا ہونا لازمی جزو ہے، محض کسی فعل کا سرزد ہونا کسی شخص کو مجرم نہیں بنا سکتا۔ عدالتی فیصلے کے مطابق قصور پولیس نے ۱۲ مارچ ۲۰۱۱ء کو محمد خالد رشید کے خلاف مقدمہ درج کیا تھا، تاہم محکمانہ انکوائری رپورٹ میں بھی ملزم کو بدعنوانی کا مرتکب قرار نہیں دیا گیا بلکہ صرف غفلت اور نااہلی کا ذمہ دار ٹھہرایا گیا تھا، جو استغاثہ کے مؤقف کو تقویت دینے کے بجائے زائل کرتی ہے۔

فیصلے میں مزید نشان دہی کی گئی کہ ٹرائل کورٹ نے جن محکمانہ دستاویزات پر انحصار کیا، وہ قانونی طور پر ثابت ہی نہیں کی گئی تھیں جبکہ انکوائری رپورٹ تیار کرنے والے افسران بھی بطور گواہ پیش نہیں ہوئے۔ علاوہ ازیں تفتیشی افسر نے ملزم کے مؤقف کی غیر جانبدارانہ تفتیش کرنے کے بجائے اسے پہلے سے قصوروار فرض کر کے کارروائی کی اور ملزم کے قبضے سے گمشدہ عدالتی فائل کی برآمدگی بھی ثابت نہیں ہو سکی۔ ان تمام قانونی نقائص کی بنیاد پر لاہور ہائیکورٹ نے ملزم کی اپیل منظور کرتے ہوئے سزا ختم کرنے کا حکم جاری کیا۔