نائب وزیراعظم اسحاق ڈار کی زیر صدارت خطے کی تازہ ترین صورتحال پر جائزہ اجلاس،ترجمان دفتر خارجہ

نائب وزیراعظم اور وزیرِ خارجہ اسحاق ڈار کی زیرِ صدارت خطے کی تازہ ترین صورتحال پر ایک اہم جائزہ اجلاس منعقد ہوا، جس میں ایران اور امریکہ کے درمیان جاری امن مشن اور پاکستان کے کلیدی کردار پر تبادلہ خیال کیا گیا۔ ترجمان دفترِ خارجہ کے مطابق، نائب وزیراعظم نے خطے میں امن و استحکام کے لیے پاکستان کی جانب سے سہولت کاری فراہم کرنے کے غیر متزلزل عزم کو دہرایا۔

اجلاس کے دوران اسحاق ڈار نے واضح کیا کہ پاکستان خطے کے وسیع تر مفاد میں ایران اور امریکہ کے درمیان مذاکرات کی کامیابی کے لیے اپنی مخلصانہ کوششیں مسلسل جاری رکھے گا۔ انہوں نے زور دیا کہ اس حساس سفارتی عمل کے حوالے سے صرف سرکاری ذرائع سے جاری کردہ بیانات ہی پاکستان کی اصل پالیسی اور موقف کے عکاس ہیں۔

نائب وزیراعظم نے میڈیا اور سوشل میڈیا پر بے نام حکام یا نامعلوم ذرائع سے منسوب خبروں کی سختی سے تردید کرتے ہوئے کہا کہ ایسی رپورٹس پاکستان کے سرکاری موقف کی نمائندگی نہیں کرتیں۔ انہوں نے پرنٹ، الیکٹرانک اور ڈیجیٹل میڈیا کو تاکید کی کہ وہ اس حساس معاملے پر قیاس آرائیوں پر مبنی رپورٹنگ سے گریز کریں اور صرف مستند سرکاری بیانات پر توجہ دیں تاکہ امن کی کوششوں میں کسی قسم کی رکاوٹ پیدا نہ ہو۔