ایرانی صدر اسلام آباد کیلئے روانہ، پاکستان کی کوششیں قابل ذکر تھیں: مسعود پزشکیان

ایران کے صدر مسعود پزشکیان پاکستان کے ایک انتہائی اہم اور تزویراتی نوعیت کے سرکاری دورے کے لیے تہران سے روانہ ہو گئے ہیں۔ ایران کے نیم سرکاری میڈیا ادارے “تسنیم” کے مطابق، صدر مسعود پزشکیان نے روانگی سے قبل میڈیا سے گفتگو کرتے ہوئے خطے میں امن کے قیام اور امریکہ و ایران کے مابین حالیہ کامیاب سفارتی بریک تھرو میں پاکستان کے کلیدی اور مخلصانہ کردار کو زبردست الفاظ میں سراہا اور اسلام آباد کی کوششوں کو قابلِ ذکر قرار دیا۔ صدر مسعود پزشکیان نے واضح کیا کہ اس دورے کا ایک بڑا مقصد پاکستان کے تعاون کا شکریہ ادا کرنے کے ساتھ ساتھ امریکہ کے ساتھ طے پانے والے حالیہ معاہدے (60 روزہ روڈ میپ) پر عملدرآمد کا تفصیلی جائزہ لینا ہے۔ وہ اس بات کو یقینی بنانا چاہتے ہیں کہ معاہدے کی تمام تر شقوں پر بین الاقوامی قوانین اور ایران کے جائز حقوق کے مطابق مکمل عمل کیا جائے۔ایرانی صدر کا ماننا ہے کہ اس معاہدے پر شفاف عملدرآمد سے خطے کو درپیش کئی بڑے سیکیورٹی چیلنجز کو کم کرنے میں مدد ملے گی۔ انہوں نے کہا کہ یہ معاہدی پیش رفت ایک ایسے نازک وقت میں خطے میں پائیدار استحکام پیدا کر سکتی ہے جب اسلامی ممالک کے خلاف اسرائیلی حملے اور وحشیانہ فوجی جارحیت مسلسل جاری ہے۔دورے کے دوران پاک-ایران اعلیٰ سطح کے مذاکرات میں دونوں برادر ممالک کے مابین تجارت، معیشت، ثقافت، سلامتی، مشترکہ ملکی دفاع اور وسیع تر علاقائی امن و استحکام کے شعبوں میں تعاون کو مزید وسعت دینے پر خصوصی توجہ مرکوز کی جائے گی۔