ایران کی منجمد اثاثے حاصل کرنیوالے ممالک، کمپنیوں کو آبنائے ہرمز سے گزرنے کی اجازت نہ دینے کا اعلان

ایران نے بین الاقوامی برادری اور بحری کمپنیوں کو سخت خبردار کرتے ہوئے اعلان کیا ہے کہ جن ممالک یا کمپنیوں نے ایران کے منجمد اثاثوں کو بطورِ تاوان یا زرِ تلافی حاصل کیا، ان کے کسی بھی جہاز کو آبنائے ہرمز سے گزرنے کی اجازت نہیں دی جائے گی۔ ایرانی میڈیا کے مطابق، ایرانی مسلح افواج کے خاتم الانبیاء سینٹرل ہیڈکوارٹرز نے امریکی صدر ڈونلڈ ٹرمپ کی جانب سے خلیج فارس میں متاثرہ جہازوں کے معاوضے کے لیے ایرانی اثاثوں کے استعمال کی تجویز کو مکمل طور پر غیر قانونی اور ڈکیتی کے مترادف قرار دے کر مسترد کر دیا ہے۔

خاتم الانبیاء ہیڈکوارٹرز کے جاری کردہ بیان میں واضح کیا گیا ہے کہ اگر کسی بھی جہاز کے مالک، کمپنی یا ملک نے امریکی تجویز کا خیر مقدم کرتے ہوئے ایران کے غصب شدہ اثاثوں سے فائدہ اٹھایا تو انہیں اس کے شدید نتائج بھگتنے ہوں گے۔ ایرانی مسلح افواج نے اعلان کیا کہ ایسے تمام افراد اور اداروں کے مال بردار و تیل بردار جہازوں پر آبنائے ہرمز کی اہم بحری گزرگاہ سے آمدورفت پر فوری طور پر مکمل پابندی عائد کی جا رہی ہے اور خلاف ورزی کی صورت میں سخت ایکشن لیا جائے گا۔

ایرانی حکام نے مزید کہا کہ حالیہ مہینوں میں خلیجی پانیوں میں مختلف آئل ٹینکرز اور تجارتی جہازوں کو پہنچنے والے نقصانات کی تمام تر ذمہ داری خطے میں امریکی فوج کی بلاجواز موجودگی اور اس سے پیدا ہونے والی غیر یقینی صورتِ حال پر عائد ہوتی ہے۔ بیان کے اختتام میں کہا گیا کہ جن جہازوں کو ماضی میں نشانہ بنایا گیا، انہوں نے آبنائے ہرمز میں محفوظ ملاحت کے لیے ایران کی جانب سے وضع کردہ بین الاقوامی پروٹوکولز کی سنگین خلاف ورزی کی تھی اور وہ غیر قانونی اور غیر محفوظ جنوب مغربی راستوں کو استعمال کر رہے تھے۔